Malaysia-ah Marquez naupang zawk chak ber

Malaysia-ah Marquez naupang zawk chak ber
Spanish rider Alex Marquez chuan Malaysian Grand Prix hnehna changin, BK8 Gresini Racing Ducati khalh chungin nimin, Pathianni khan Sepang tlankawngah pakhatna dinhmun phu zetin a luah a, season kal laia a vawi thum chakberna niin, MotoGP standing-ah pahnihna a chang nghet ta bawk.
Kum 29-a upa Gresini rider hi Inrinni khan intlansiak aitechhinna sprint race-ah pahnihna ni tawhin, MotoGP World Championship-ah champion fel tawh leh a u ni bawk Marc Marquez hnungdawltu a ni.
A tuk, Pathianniah a rawn chetha zual a, amah hnaih bertu leh a chipui ni bawk Spaniard Pedro Acosta aiin second 2.676 zetin a thleng hmasa a; kumina Spain ram pawna a chak tum khatna niin, a hmain season kal laiah Spanish leh Catalan Grands Prix hnehna a lo sualchhuak ve tawh a ni.
Marquez naupang zawk hian nimin Sepang tlankawnga 20-lap race-ah Acosta lehpelin hma a hruai hma hle a; a hnuah Italian rider Francesco Bagnaia tan pawh khawih phak loh a ni zui leh ta a ni.
Inrinni sprint race hnehtu pole-sitter Bagnaia hi pathumna ni thei mai dawna a lan hnu lap 18-naah chesualin a tlan zui thei ta lo hlauh a; Honda bike khalhtu Joan Mir chuan hlawkpuiin lawmman semna dawhsan hniam ber a luah theih phah.
Sepang circuit lum leh uap hnawng churh hnuaiah thla hmasa Japan rama a MotoGP title pasarihna la fel tawh Marc Marquez chu hliam avangin a inlan thei lo a, a tan season a tawp fel tawh a ni.
Pathianni vek khan world champion tharlam Jose Antonio Rueda leh kum 20-a upa Noah Dettwiler-te an insut avangin Moto3 race tlan tan hun tihkhawtlai a ni.
Rider chesual pahnihte hi thlawhna hmangin damdawi in panpui an ni a, race medical director tarlan danin, nikhua an hria!
MotoGP race hnehna a chan hnuah Marquez chuan Moto3 rider inhliam pahnihte chu a ngaihtuahin, a tawngtaipui tih a sawi.