Maldives inthlanah China awn lamin chakna chang

Ngaihven hlawh tak Maldives inthlanah President Mohmed Muizzu party te chuan hneh takin chakna an chang a, tihian Muizzu chuan thuneihna a sawhnghet zel a ni.
Provisional result tarlanah People’s National Congress (PNC) te chuan member house seat 93 awmah seat 66 an la der tawh a.
Analyst-te chuan China thlawp Muizzu party te chuan chakna an chang tia sawiin India thlawp party te chuan an phak lo ta hle a ni.
Muizzu hi pro-China niin kum tam tak chhung Maldives a thenawm ram India influence chu tihhniama China nena inzawmna tha zawk neih duh a ni.
Local media te chuan PNC te chakna chan chu ‘super majority’ tiin tihian parliament ah hmun thuma thena hmun hnih seat an lak hmel avangin constitution pawh thlak dang lam thei an ni dawn a ni.
Opposition party lian ber Maldivian Democratic Party (MDP) te chuan seat 15 chauh an la thei a. Pathiannia vote thlak a nih hma kha chuan parliament a seat nei hnem ber an ni thung.
“Muizzu tan chuan hlawhtlinna nasa tak a ni” tiin Azim Zahir, Maldives analyst leh University of Western Australia a lecturer ni bawk chuan a sawi a.
“Politics thlirna atang chuan Muizzu chuan engkim a thunun ta tihna a ni a. Parliament ah member a neih hnem ber avangin judiciary pawh a thu ang chuan a thunun pawh a tih theih ang” tiin Zahir chuan a sawi.
Muizzu hi nikum khan Maldives in ‘India first’ policy a neih tihtawp auhlaa neiin thuneihna a chang a. Thuneihna a chan hnuah New Delhi a la tlawh miah lo bawk a. Delhi influence tihtawp nan Maldives a India sipai te chu thawn haw vek intiam a ni bawk.
Maldives-ah hian India sipai 85 vel Delhi-in Maldives hnena aircraft a pek te leh helicopter te enkawl tur dahin an awm a. Heng zinga batch hnihte chuan Maldives an chhuahsan tawh a, sipaite chu civilian technical staff ten an thlak a, India sipai la awm chhun te pawhin 10 May hmain Maldives an chhuahsan vek dawn bawk a ni.
India sipai thawnhaw hi Muizzu-a’n Delhi aia Beijing a thlan zawkzia lantirna anga ngaih niin January thla khan Beijing tlawh bawkin thawhdunna tur inremna an ziak bawk.
March thla khan Male chuan China nen ‘military assistance’ agreement ziak bawkin China chuan Maldivian security forces te training a pe dawn a, non-lethal weapon a pe bawk ang. A hma chuan Maldives sipaite chu India leh US sipai ten training an pe thin a ni.
Maldives hi India tan chuan a awmna hmunin a zir em avanga security thila pawi mawh em em a ni a, tun hma atang tawhin India awn lam ni char char a ni a. Muizzu awm hnuah China a awn ta a ni.