Malsawmhlua kutah silver

On Dec 8, 2025 1 0

Malsawmhlua kutah silver
December ni 1-6, 2025 chhunga Bhubaneswar, Odisha-a khelh zawh tak Yonex-Sunrise 37th Sub-Junior (15 & 17) National Badminton Championship 2025-ah New Serchhip Badminton Club tana khel mek Malsawmhlua (Mama) s/o Albert Lalnunhlima, Serchhip P&E Veng leh a kawppui Aanayan Bora (Assam)-te chuan boy’s doubles category-ah silver medal an dawng.
Mama leh a partner Aanayan-te hian seeded no 7 ni chungin tournament an hmachhawn a; hei vang hian round hmasa ber awlin, round of 32 atangin inkhelh bul an tan. Hemi round-ah hian Chonvung Pochury leh Heloka Swu-te inkawp chu 21-10, 21-10-in awlsam takin an hneh.
Round of 16-ah Parth Gawri leh Harsith tangdun chu 21-17, 21-12-in an hneh leh. Quarter-final harsa takah 21-15, 17-21, 24-22-in seeded no 4, Akhil Reddy Bobba leh Nischal Chand-te inkawp an paltlang hram.
Semi-final match-ah Jangjeet Singh Kajla leh Arnav Sharma (seeded 6) tangdun chu 21-19, 22-20-in an hneh leh a; final-ah erawh seeded no 1, Punith S. leh Pavan S. inkawp lakah 19-21, 10-21-in an tlawm a, silver medal an dawng ta a ni.
Mama hian National Ranking Tournament-ah gold medal 1 (U-15 BD), silver medal 2 (U-15 BD) leh bronze medal 1 (U-17 BD) a lo vaw chhuak tawh a, National Championship-ah erawh a lawmman lak vawi khatna a ni.
Mimala chhiara Mizoramin National Badminton Championship (sub-junior leh junior)-a medal la thei kan neih parukna a ni bawk.
Malsawmhlua hi Tata Trusts, NEIDA, PGBA leh MBA-te thawhhona Mizoram Badminton Initiative phase 1 hnuaia badminton khel tan niin, tunah hian PGBA-ah a awm mek a; Mizoram Badminton Association chuan a hlawhtlinnaah lawmpuiin, a aia sang zawk thleng chho zel turin duhsakna a hlan nghal bawk a ni.