Mamawh min pe theitu kan hnawl – State BJP vice president

Mamawh min pe theitu kan hnawl
– State BJP vice president
Dampa bial by election-a campaign-a rawn kal Union minister-te hnenah Dampa bial mipuiin an mamawh an lo thlen a, chumi pe tur chuan an candidate vote tling tura an ngen let ve na chu a hlawhtling loa, kan mamawh min pe theitu tur kan hnawl chu a pawi hle tih BJP Mizoram hruaitu JB Rualchhinga chuan a sawi.
Thawhtannia an party office-a inkhawmah BJP Mizoram vice president JB Rualchhinga chuan, Dampa bial inthlana Union minister-te rawn campaign chu bial mipuiin an mamawh an thlen an ngaihthlak sak bakah an thil dil tihlawhtling turin BJP candidate an thlantlin ve thung a ngai tih an hrilh a. Chutihlaiin an mamawh pe theitu aiin, opposition MLA ni tur bawk an thlangtling tih a sawi.
Reiek mipuiin Reiek leh Lengpui inkalpawhna an dil a, link road pawh an dil bakah Reiek Field chu phullem phahna thlengin an dil a. Heng bakah hian Dampa bial mamawh dang pawh Union minister hnenah khaw hrang hrangin an dil a. BJP candidate thlantlin a nih chuan hengte hi tihhlawhtlin a nih tur thu an tiam tih a sawi a ni.
“Kan mamawh min pe theitu lam kan hnawl thin hi a pawi a. Union minister-te hnena kan dilah kan chiang lo zawk a ang hle. Kan mamawh kan tih hi kan lo mamawh tak tak lo a ni mahna, vawiina kan puarna tur chauh ngaihtuahin vote kan thlak leh mai thin. Nakina kan la mamawh tur tho kan hnawl thin hi a pawi a. Mizo mipui hian kan inhriatchian a ngai tawh hle. Kan mamawh tak tak kan hriatchian hunah kan mamawh min pe theite kan vote chhuak ngeiin a rinawm,” JB Rualchhinga hian a ti.
LADC inthlanpui awm turah sawrkar laipui neitu party, kan mamawh min pe thei tur kan thlan chhuah a ngai tih a sawi bawk.