Mamit DC office-in Jubilee lawm

Mamit DC office-in Jubilee lawm
Mamit district bawrhsap office chuan a kum 25 tlin, Silver Jubilee chu Thawhtanni khan a lawm.
Jubilee lawmnaah hian Mamit district bawrhsap hlui Nghaklianmawia chu khuallian a ni a. Bawrhsap a nih laiin, district dangin an tih theih chuan kan ti ve thei tur a ni, tih rilru puin hna an thawk thin tih sawiin, tuna bawrhsap leh a thawhpuite pawhin hetiang rilru, neitu rilru puin hna thawk zel turin duhsakna a hlan tih a sawi a ni.
Mamit district chu aspirational district a nih angin, district hmasawnna atana thawktute pawh a tha hlang awmkhawm an ni, tiin, district hmasawnna atana theihtawp chhuaha hna thawk turin a chah. Mamit khua chu lawm nachang hria leh hmasawnna ngaina tak khua an nih thu sawiin, tanrualna leh inlungrualna nen tha taka thawkho zel turin a chah bawk.
Mamit bawrhsap hlui bawk Vanlalngaihsaka pawhin hmanpuiin, Mamitah bawrhsap tum hnih leh SDO (Sadar) a lo nih tawh avangin a mikhual loh thu leh district hmasawnna tura tha taka hna thawk zel tura a duhsak thu a sawi.
Mamit district hian kum 25 chhungin bawrhsap 17 nei tawhin, kum 1998 vawiin angah Z Lalhmingliana, MCS hoin bawrhsap office Mamit Hmar Veng ami luah tan a ni.
Bawrhsap office kum 25 tlin lawmna hi hun hniha then niin, bawrhsap ni lai VL Remliana chuan a kaihruai. Hun hnihnaah bawrhsap pisa kawtzawlah hman niin, GHSS Mamit leh Govt. M/S -III ten hnam lam an entir a, zaithiam zai ngaihthlak a ni a. Jubilee lawmna ruai buatsaih a ni.