Mamit Hospital-ah dialysiskhawl bun tan leh si dawn

Mamit Hospital-ah dialysis
khawl bun tan leh si dawn
Mamit District Hospital-a hman tur dialysis khawl pali zinga pahnih chu Nilaini atang khan a bun dan buaipui tan a ni.
Mamit District Hospital-a hman tur hian dialysis khawl pali CSR Fund atanga pek niin, heng zinga pahnih chu chhuanlam engemaw vangin, Serchhip District Hospital-a hman tura lakchhuah a ni. Hei hi Mamit-a tlawmngai pawl hrang hrang leh political party inzawmkhawm chuan duh loin, khawl dah lailawkna hi an kalh a, chabi an kawl.
Mamit atanga dialysis khawl lakchhuah tum a nih thu Mamit bialtu MLA Er H Lalzirliana chuan hria in, a remti lo hle a, Nilaini khan Aizawl atangin Mamit-ah tlan thla in, a ho hian Hospital building tharah khawl dahna tur room ruahman a ni a, a khawl install-tu tur technician a hruai tel nghal a ni.
Mamit bialtu MLA chuan, an hospital building chu CSR fund-a sak tho a ni a, khawl pawh hi CSR atanga an neih a ni a. Hospital hi harsatna vangin a hun taka luah turin an zo thei loa, chutiang bawkin khawl pawh a hun takah bunfel theih a ni bik lo, tiin, “Khawl hi April-ah a lo thleng a, bun hmasak ngai RO khawl (tui tihthianghlimna) hi June thla laihawlah a lo thleng a, ni 15 chhunga bun zawh theih a ni lo. An chhuanlam siam hi chhuanlam puitling a ni lo,” a ti.
A install-na an siam anga, dialysis khawl pahnih an lak sak tawh pawh lalet leh turin an bei dawn tih Er H Lalzirliana hian sawiin, “Mamit district tan chauh ni lo, hmundang pawh kep thei tur, hmundang atang pawha an rawn pan tur khawpa rotling install ngei ka duh,” a ti.
“Peih vek tawh anga report a ni a, dialysis khawl room tur hi a awm ngei ngei tur a ni a, awm lo a ni thei tawh lo. Kan duh chuan kan ti hram thei, tih loh hram duh pawhin a tih loh hram theih,” a ti.
NGO Coordination Committee Mamit chairman Vanlalchhuanga pawhin, khawl an phurhchhuah tawh chu a thlakna awm ngei turin an phut a, an umzui zel dawn tih a sawi. Tuna la awm chu engti kawng mahin lakchhuah a ni tawh tur a ni lo, tiin, “Company pawhin an phur chhuak tur a ni bawk lo. Mamit MJA hnena Health director-in a lo tiam tawh angin, a thlakna tur hi rang takin kan hmu tur a ni. Sawrkar hi a intiamaah ding nghet turin kan phut tlat a ni,” a ti.
Bialtu MLA ho hian NGO Coordination Committee member leh District Hospital thuneitute nen khawl bun dan tur leh a dahna hmun tur enfel nghal a ni a. Technician-in buaipui nghalin, vawiin – July 3 atangin bun tan a ni dawn.