MAMIT KAN VANGLAI LEH SAWRKHAR THAR LAK LUH NI
Lalhmangaiha Sailo
Holy Cross Bakery
9436360275
Sawrkhar thar siam tuma mahni rem hriat leh Phak ang tawk tawka kan phet buai atalangin kan thu kal lai mek Mamit Kan Vanglai kan chhawp chhuah sate pawh kan ti chingpen zova, inthlan buaipui Campaing leh Vote tlak dan assessment tih vel nana lo phihdarh tawk nen tunah chuan, kan tlingtla felin, Sawrkhar thar pawh kan hmu ta, kei kum 80 (sawm riat) ral kai fe tawh, tar awma awm mai mai tawh awm tak pawh hian awm mai mai thei bik loin, ka vak chhuak ve sek a, kan han inthlang zo zet kha chu ZPM hian Seat 25-30 hi an hmuh phak ngei dawn hi maw ka tia, ka beisei deuh leh thlir bik deuh Pathum te tling ve ta lote erawh chuan min nghawng deuh dawt mai, Lungawi loa han lak leh tlin vek theih lah ni hek suh.
Inthlan hma Hachhek tlangdung leh Langkaih Phai ruam ka zuk thleng thla chu 2003 Election tuma PC Ticket-a ka tlin lohna bial a ni a, Lung hluite a leng a, Election Campaign-a thawkchhuak ve e ti lo chuan thian hluite ka zuk hmu a, Lung te a leng thar a, thenrual mual liam tawhte chanchin leh hun hlui hla tak tak chanchinte kan sawi a, chungte chuan lung an tileng thar zual a, thenkhatin “Pu Hma ni tin chanchinbuah hian Mamit kan Vanglai” tih i rawn ziak thin a, Lokichera – Zawlnuam kan Vanglai tih te thleng hian rawn ziak ve thei la. Kristian Ramthar High School din tirh lai leh Khawtlang hnuchhawn ram tih thin lai chanchinte kha thangtharte tan tak hian hriat a chakawm a lawm le te chu min la ti ta deuh deuh a.
Sawrkhar thar Chief Minister, Council of Minister te leh Protem Speaker lakluhna Circular Lawn, Raj Bhavan-a Dt. 8.12.23 a kan han tel ve chu, ropui ka ti in, lawmawm ka ti khawp mai, chawlhni Sunday sikul inkhawma Kawrchung thulkhung ha ve hram chauh thin in, neih ang tawka incheiin Neck Tie suih meuhin kan tel ve chu, nihliap hawlin, khawr deuh tutin kan inhria a, chuti chungin a phili ber Pawlah erawh ka tang a, Minister leh MLA tharte chibai ve hram tumin ka vir sek a, Siniar pui e ti lo chuan MLA thar leh hluiho zingah hriat loh engemaw zat zuk la nei a.
Sawmna Card-ah khan dar 11 AM a tan tur an ti nain dar 10:20 AM hi chuan thlen ni se tih an note chu zawm hram tumin, a thleng hma pawltak zingah ka tang a ruahsur laia chhuak ka nih avangin a hmun sawn turah ngaiin kan vir kual hman thelh a. Flag Car loa chuang tukhaw hriat ni lem lo Raj Bhavan Gate-a tlanluh tum ta ngawt chu, Card te phawrh chhuakin kan tlan lut ve ta mai a. He lai Raj Bhavan hi kum 60 hma lam DC Bangla a nih hun lai a, sawrkhar hna thawk ve tura ka interview na leh Governor – Khasi PR Kyndia awmlai a, Elbethel Publication Board Pu K Hawla Sailo kan Chairman hova, kan va kawm leh tawngtai Bethel kan va neihpui tih loh chu, ka la tlawh lo – zing lam ruah sur reng avangin, helai hmun hi Samiana chung nei Pandal mawi hnai taka buatsaih ni mahse a chhung Phaitual hnim huh leh diak avangin kal hmasa tam tak te chu Pheikhawk a berh khawp mai. Khuain a zir lo nain hma takah Chief Secretary hoa Programme ruahman leh buatsaih a ni a, a fel thawkhat a, Receptionist fel leh zei tak tak ten min lo dawngsawnga keini Consultant ho siniar tak takt e pawh CM leh Minister ho hnung Val Upa, Council ho bulah kan hu a, chang sang kan inti khawp mai.
He hun ropui leh danglam riau bikna chu, Synod rorel inkhawmpui leh UPC Kohhran khawmpui lian neih lai a ni chung hian Pastor Siniar leh Kohhran Upa hmel hmuhtur pawh an tam khawp mai. Hun serh hmangtu Rev Vanlalzuatan hun chep tak kara Bible chhiara tawngtaina an hmang te kha Sermon ropui tak a va ni teh lul em!!! A ropui e. Chief Minister leh Minister khati zat khan hun an hmang a, a ninawm lo in, rehearsal-na hun pawh an nei pawh a rinawm loh nen, chuti chungin tumah han che lai leh zei lo deuh pawh an awm lo ve. Camera man te leh Journalist ho te nge!!! Receptionist te thu miah lo a, ding tluan te hlei hlei kha an fakawmin an Smart a, tiropui tute tak pawh a ni. Synod Zaipawl nge!!! Thiam tak mai a “Aw nang kan Lal kan Pathian” tih hla an sak te khan an tiropuiin a inhmeh thlawt e.
Ropui leh lung tileng em em mai chu maw!! Kan Minister thar Pu Vanlalhlana leh Pu Van Lalthlana te pahnihin Tawlhloh Puan (Mafler) mawi leh inhmeh zet mai an han bat zet kha chu… People Conference vanglai leh Brig T Sailo min hriat chhuah tir a, an hmel leh an Pumruain a zir bawk a, an ti ropui thawkhat e, an nupuite rem hriatna leh buaipui pawh a nih hmel e. Midang zawng zawng ten Pu PC Vanlalruata chenin Suit nalh taka incheiin Neck Tie nen Smart takin an rawn inchei te kha a ropui a, Pu F Rodingliana leh Pro tem Speaker te erawh hnathawk bawrh bawrh mi an uniform pangngai deuh nen a an rawn inpho chhuak pawh an inhmeh tho mai e.
Ropui lehzual ka tih chu maw!! He Programme hlimawm tak hman zawh hnu a, Chief Minister-in anmahni in a, thenawm khawveng leh mi tam tak lawmpuina chibai buk tuma lo nghak thuap tute tlanpel a |awngtai Bethel Camping Centre a zuk tlawh hmasa hi a ropui tak zet zet. ZPM-in sawrkhar huna tihtur pawimawh an duan zing ami “Ram Rorelnaah Pathian Ram lo thleng rawh se” tih bawhzuina hmasa ber hun an hmang hi. Sustainable Development & Reform Policy (SDRP) Chapter VIII h & I te a ropui in a lawmawm e.
He thu ka hriat rual hian, kan fapa Lalramhluna Sailo in Zawlnuama kan ram Picnic Spot siamna hmun atana remchang tak leh Thlai chi hrang hrang chinna hmun chu, siamremin Chhanchhuahna Camp atan tiin Building lian zet mai chhawng thum dawn a sak te chu min hriat chhuah tir a.
Aw le, Sawrkhar thar, kalphung thar mipui Sawrkhar chuan chak taka hma an lak theih nan leh Chief Minister-in hmalak hmasak tura a rawn chhawp chhuahte chu a hlawhtlin theih ngeina turin theihtawpa tanpuiin, i tawngtaipui zel ang u.