Mamita JNV campus thar Prime minister-in hawng

Mamit Luangpawla Jawahar Navodaya Vidyalaya school campus chu Thawhlehni khan Prime minister Nadrendra Modi chuan inbiak hmuh theihna hmangin a hawng a. Hemi puala JNV campus-a hun hman chu Mamit bialtu MLA Er. H Lalzirliana’n a hmanpui.
Prime minister chuan zirna kawnga hmalakna bakah India ram chawikanna tura scheme hrang hrang kalpui a ni tih a sawi a. Heng scheme hnuaia hnathawh hi a chhawrtu mipuiin tangkai leh hlawk taka an hman thu a sawi.
MLA Er H Lalzirliana chuan JNV School campus-ah building sak zawh a nih theih nan theihtawp chhuah a ni tih a sawi a. Campus chu Mamit khua tan chauh nilo, district chhung zawng zawng ta a ni, tiin, an district-a hnam hrang hrangten zirna hmunkhata an zir chu hmuhnawm a tih thu leh mahni hnam ziarang pholang thei naupangin an entir chu zirtirtute fakawm a tih thu a sawi. Zirlaite chu Mizoram pela hna thawk theia inbuatsaih tur leh chumi ah chuan Hindi thiam ngei ngei tura theihtawp chhuah a tul tih a sawi a ni.
JNV school hi Mamitah kum 2008-a din a ni a. Zirna in hmun nghet an neih hma hian a theih ang angin hmundangah zirna kalpui thin a ni. Tuna hawn tak an school campus hi kum 2013 khan sak tan niin, 2023 September khan cheng nuai 2973.64 senga luah theiha sak zawh a ni.
Campus-ah hian academic building -1, kitchen & dinning hall – 1, boys dormitory – 4, girls dormitory – 2, staff quarters 3, principal residence a awm a. Pawl 6 atanga pawl 10 thleng zirlai 155 an awm mek a, principal hoin staff 21 an awm a ni.