Mamita sawrkar hnathawh enfiah

MNF Thalai Hqrs. hruaitute chuan an president Robert Romawia Royte, MLA hoin Nilaini khan Mamit district-a sawrkar hmasa hun lai atanga hma lo lak tawh, tuna chhunzawm mekte a hmunah an enfiah.
MNF sawrkarin sawrkar laipuia a nawr anga Tripura atanga gas pipeline, Hachhek biala phum tan tawh, chhunzawm zel dan an en a. Mamit district kaltlanga gas pipe phum hna chhunzawm zel a ni chu lawmawm an tih thu an sawi.
Kawrthaha cheng nuai 3286.38 senga sak mek Residential Sports School an tlawh a. He project-in a ken tel, phullem football field chu zawh tawh niin, volleyball court leh basketball court sak mek a ni. Building sak tur zingah multipurpose hall zawh tawh niin, hostel building pahnih, academic building, zirtirtu quarters leh principal quarters chu hna zaa 87 zawh tawh a ni tih site engineer chuan a lo hrilh a, sawrkarin an bill pe se chuan zo mai thei an ni tih a sawi.
Mamit Luangpawla Residential Sports School, nuai 3200 chuang senga sak pawh an tlawh a. He sikulin a ken tel multipurpose hall sak zawh tawh niin, astroturf football field, basketball court leh volleyball court chu kumin June-a zawh an tum tih site engineer hian a sawi. Building dang panga chu zaa 85 zawh tawh niin, sawrkarin bill a pek chuan hna chu zo mai thei an ni tawh tih an sawi.
MNF Thalai hruaitute chuan Mamit Mangkhawngdaia Community Centre sak, basketball court, tennis court pahnih, futsal ground an tlawh bakah Mamit Multipurpose Indoor Stadium sak mek an tlawh a. Mamit khawpuiin sports infrastructure tha tak tak an nei ta chu an lawmpui tih an sawi a ni.
An tlawh hoah sawrkar hmasa hnathawh sawrkar tharin tha taka a chhunzawm chu lawmawm an tih thu sawiin, department tinin sawrkar hmasa hnathawh tha takin chhunzawm vek se chuan sum lapse leh a kaihhnawih harsatna thleng lo tur a ni tih an sawi bawk.