MAN KHER NGAI LO WRITER
Dr. C. Lalrampana
A KAMKÊUNA
Lehkhabu emaw chanchinbu emawa thuziak, thawnthu, fuihna, zilhna, zirtirna, hla chham mi, ziak lama inhmang, a bik takin eizawnna emaw, hnathawhna emaw anga ziaktu emaw journalist emaw, clerk, lehkhaziaktu emaw, chutiang chi emaw chu wrtiter kan tih hi a ni. Lehkhabu ziaktu (author) leh ziaktu (writer) hian ziaktu nihna a kawk ve ve a. A tlangpuiin ‘author’ tih thumal hi professional taka ziaktu, a bik takin lehkhabu chhuah tawh ziaktu sawina atan hman a ni. ‘Writer’ tih thumal hi a tlangpuiin eng thil pawh ziaktu sawina atan hman a ni a, lehkhabu tih loh hnathawh pawh a tel.
ZIAKTU SAWINATE
Saptawng hi West Germanic tawng a ni a, kum zabi 5-7na laihawl vela Britain rama Anglo-Saxon pemlutte’n tuna Germany chhim thlang lam, Denmark khawthlang lam leh Netherlands atanga lo pem lut an rawn hruai Ingvaeonic tawng atanga lo chhuak a ni. Saptawng hi a hausa hle. Ziaktu ‘writer’ sawina thumal pawh hi chihrang 42 lai an nei a, a lâr zual deuh deuhte chu author, scribe, novelist, columnist, essayist, litterateur, man of letters, scrivener, biographer, contributor-te a ni. Mizo tawng erawhin ‘Ziaktu’ tih mai bak thumal dang a vang hle. Chuti a ni chungin Mizotawng aiin saptawng thumal ‘writer’ emaw ‘author’ han tih deuh kher hi kan ngaisang zawk lehnghal niin a lang. Khawvel hnama zawnga mahni tawng zahpuitu lianber kan ni ngei ang.
KHAWVEL HUAPA ZIAKTUTE
Khawvel huapa ziaktu ‘writer’ / ‘author’ tha leh lâr tak tak ziaktu hlawhtling tam tak an awm. Khawvel pumah hian ziaktu engzat nge awm tih dik taka sawi theih a ni lo, mahse, statistics thenkhata a lan danin kum 2021 khan US-ah khuan ziaktu 49k vel an awm a. Khawvel pumpui huap chuan maktaduai 2.5 an tling tawh ngeia ngaih a ni. Heng zinga lar deuhte chauh tarlang ila: Charles Dickens; Jane Austen; Leo Tolstoy; William Shakespeare; Fyodor Dostoevsky; George Orwell;; Ernest Hemingway; J. K. Rowling; Mark Twain; Stephen King; Agatha Christie; Homer; Dante Alighieri; Edgar Allan Poe; Hans Christian Andersen; Haruki Murakami; Jules Verne; Margaret Atwood; Toni Morrison; William Blake-te an ni. Hengho hian an nihna uluk taka vawnghimin tu pawi mah an sawi ngai lo.
INDIA RAMA ZIAKTU L RTE
India ramah ziaktu fing leh thian lar tak tak 16 lai an awm a, chungte chu: Narayan Gangopadhyay; Birendra Krishna Bhadra; Shashi Deshpande; Ramdhari Singh Dinkar; Sarojini Naidu; Pudhumaipithan; Hemchandra Barua; Homen Borgohain; Atul Chandra Hazarika; Amulya Barua; Ambikagiri Raichoudhury; Dimbeswar Neog; Benudhar Sharma Subhadra Kumari Chauhan; Savitribai Phule; Tulsida Valmiki; Rabindranath Tagore, Aurobindo; R.K Narayan te an ni. Heng kan India ram ziaktu lar leh thiam tak takte pawh hian tu pawi mah an sawi ngai lova hneh takin an ziaktu nihna leh zahawmna chu an humhim zawk thin.
MIZORAMA ZIAKTU L RTE
Mizo zinga ziaktu langsar zualte chu James Dokhuma (1932–2008), Khawlkungi (1927-2015), B. Lalthangliana (1945), Siamkima Khawlhring (1938–1992), Ralte L. Thanmawia (1954), Nuchhungi Renthlei (1914–2002), Lalthangfala Sailo; kum 1986 leh 2009 khan Literature lamah Padma Shri chawimawina an dawng a ni. Mizo novel hmasa ber Hawilopari ziaktu L. Biakliana (1918–1941), Kaphleia (1910–1940), C. |huamluaia (1922–1959), K.C. Lalvunga leh J. F. Laldailovate an ni. Anniho pawh hian khawvel huapa ziaktu lâr leh India rama ziaktu lârte ang bawkin an nihna zahawm tak hi uluk taka vawnghimin tu pawipang mah an khawih ngai lo, an ngaihsanawm takzet a ni.
A TLANGKAWMNA
Khing ziaktu fel leh fing tak takte bakah pawh khian international & national news paper, Magazine etc-a ziaktu fing leh thiam lâr tak tak tam tak tarlan sen loh an la awm cheu. Khing ziaktute khi fake account, pen name, forgery tih velah an inhnamhnawih ve ngai lova, mahni inthukru chungin mipui an hmachhawn ve ngai hek lo. Annihna ang angin an lang ngam mai a ni. Tunhnaiah pen name, fake account hmang pakhat David Sailo hminga thu ziak thin chuan lei chawi theihna tham thu a ziak nia a lan avangin FIR a hmachhawn a, cyber crime Police-te chuan 31-05-2024 khan manin police custody-ah dah a nih hnuah an chhuah leh a. Jun 4, 2024 khan man nawn lehin jail-ah dah mek niin a lang. Mizote hian Social media hmanga mi kher thiam, ruling party apiang sawichhe thiam, thu feikibara mi khawh thiam apiang hi ziaktu thaah kan ngai niin a hriat theih. Kan caliber a la hniamin kan khawhawi a la zim hle mai! Khing ziaktu writer/author lâr leh tha tak takte khian thu thin khei, thu feikibar leh lei chawi theihna lam an ziak ve ngai lo. Chuvangin, mizote hi kan inbihchian a va hun tehlul ém! Ngaihsan tur dik, chawimawi tur dik, ram leh hnam tana rohlu, mi chhawrnaawm tunge tih kan ngaihtuah a hun tawh hle. Police man kher ngai lo ziaktu ‘writer’ tha tak tak kan neihte khi kan entawn a tha hle. Tlanchhe chung leh mahni inthup leh inthukru chunga ziaktu writer nih hi thil hlawk lo ber a ni a, intihhmuh chi a ni lem lo tih i hretlang theuh teh ang u.