Mana Motors-in Mahindra XUV 7XO an tlangzarh

Mana Motors-in Mahindra XUV 7XO an tlangzarh
Mana Motors chuan Mahindra XUV 7XO an tlangzarh a, kumina an showroom-a lirthei an tlangzarh hmasak ber a ni. Mana Motors hian kum 2025 kha an khar tha hle a, December 2025 kha thla khat chhunga lirthei an hralh tam ber tum a ni bawk a, kum tharah an phur tlang hle a ni.
Nimin chawhnu lam khan Bawngkawn-a an showroom-ah Transports Department Director, Er R Lalrammawia’n Mizorama hralh chhuah turin XUV 7XO hi a khuh hawng a, Mizo mipuiin car tha neih an phu a, chutiang car a tlangzarh theih avangin lawmawm a tih thu a sawi a, Mana Motors chu lirthei an hralh chhuah hnuah enkawl zui lamah Mizorama tha ber pawl an nih thu sawiin, an department kaihhnawih sawi telin mipui awlsam nan theihtawp an chhuah a, mipuiin harsatna an nei a nih chuan hrilh hreh lo turin a ngen. An department-ah dan ang taka lirthei ziah luh nuai 3.5 chuang hret a awm laiin, a huna chhiah pek loh avanga document fel fai lo 88,000 chuang an awm a, ‘Mizoten lirthei kan lei rualin chhiah kan lei tel tih kan hriat a ngai hle a ni,’ a ti bawk.
2025 chhunga India rama passenger car hralh hnem ber dawttu Mahindra chuan XUV 7OO thuam thain a hming an thlak a, January 5 khan India ramah XUV 7XO tih hming put tirin an tlangzarh tawh a, tunah chuan kan khawtualah lei theih turin an chhawp chhuak ve leh ta a ni.
August 2021 khan XUV 7OO tlangzarh a ni a, Mahindra-in an hlawhtlinpui viau a, December 2025 thlengin 3,32,000 chuang an hralh hman. Mana Motors Dealer Principal Dr Franklin Lalrinngheta chuan tuna an tlangzarh XUV 7XO hi 7OO thlakna a nih thu sawiin, tha, him leh chuan nuam lehzual tura siam a ni a, chhungkaw lirthei ttha tak a nih a beisei thu a sawi bawk.
Dr Marina chuan December 2025 kha an tan a chhinchhiahtlak hle tih sawiin, “Thla liam taah car 217 kan hralh a, Mana Motors a din hnua thla khat chhunga kan hralh hnem ber a ni. Car pakhat cheng nuai 10 chuang deuh vek a ni a, kan lawm hle a ni,” a ti.
India rama utility vehicle siamchhuah lama hmahruaitu ni mek Mahindra chuan nasa takin hma a sawn a. Tuna, Mahindra XUV 7XO phei hi chu tunlai technology thar ber nena thuam a ni a, Level 2 ADAS leh Sen+ bakah ADRENOX 93 features te nen a thuam a ni. SENSE+ Technology phei hi chuan motor hma lama awm mihring leh ran te pawh a thliar hrang thei vek bawk a ni. Tin, khawvela a hmasa ber ni turin motor chuan tinuamtu technology thar (DAVINCI DAMPING TECHNOLOGY) a rawn hmang bawk a, he technology thar hian mipui ngaihven a hlawh hle a ni.
XUV 7XO hi chi hrang paruk awmin rawng hrang chi sarih a awm bawk. Petrol engine 2.0 litre niin a man tlawm ber (on-road price) Rs nuai 15.49 niin a to ber Rs nuai 24.91-in a lei chhuah theih a, diesel engine 2.2 litre niin a man tlawm ber Rs nuai 16.91 niin a to ber Rs nuai 25.66 a ni ve thung.