Manchester City an chak awlsam

Nilai zan khan UEFA Champions League khelh chhunzawm a ni a, champion tura rinkai Manchester City chuan awlsam takin hnehna an chang. City an chak rual hian EPL hmahruaitu Liverpool pawhin hnehna an chang ve bawk.
Haaland a inlar leh ta
EPL champion leh Champions League-ah pawh champion tura rinkai Manchester City chuan Etihad Stadium-ah Sparta Prague an mikhual. An mikhualte hi 5-0 ngawtin an lo hneh a. EPL-ah goal thun lama goal deuh det Erling Haaland chu UCL lamah a inlar leh ta a, goal hnih a thun. City tan hian season tharah khelhna hmun chang tam thei lo Phil Foden pawhin goal a thun ve bawk.
City hian an mikhual Sparta Prague lakah bul an tan tha viau a, inkhel tan atanga minute thumna lekah Phil Foden chuan Manuel Akanji siamsak atangin hmahruaina goal a thun. Hma takah goal thunin, bul tan tha viau mah se City hian goal an thun belh thei lawk lo thung. Ball chang tak viau chungin City hian chawlhlawk hmangin an hmahruaina an tizau thei lova, si khat faia hmahruai chungin chawlhlawk an hmang.
Chawlhlawk hnu lamah City an khel tha leh zual a, goal li lai an thun belh. Minute 58-naah Erling Haaland chuan Savinho siamsak atangin an goal hnihna a thun a, an hmahruaina a tizau. Haaland goal thun hnu hian Wolves laka chakna goal thuntu John Stones chuan minute 64-naah an goal thumna a thun belh zui leh nghal zat bawk. Inhnaihchilh taka goal an chhuah zawn vangin Sparta Prague an buai a leh zual. An khingpuite an buai viau laiin City an phur leh zual sauh thung a, goal pawh an thun belh thuai. Stones goal thun atanga minute li hnu lekah Haaland chuan Matheus Nunes siamsak atangin an goal lina a thun zui leh bawk.
An mualah ngei si li fai ngawta hma an hruai tawh vangin Pep Guardiola chuan a player a thlak kual a, goal hnih thun tawh Haaland a la chhuak. Haaland chhuah hnu hun tawp dawn hnaih minute 88-naah City hian penalty an hmu. He penlaty hi vawi hnih assist nei tawh Matheus Nunes chuan a pet goal a, an goal ngana thunin a tawp a khar.
An mualah an chak leh tak vangin Manchester City hian khelh thum atangin point 7 an hmu a, pathumnaah an awm mek. City chunga awmte hi EPL club Aston Villa leh Liverpool te an ni.
Liverpool an kal zel
Manager thar Arne Slot hnuaia khel tha, EPL hmahruaitu ni mek Liverpool chu champions league lamah pawh an khel tha viau a, RB Leipzig hnehin vawi thum an chak zawn ta chiah.
Liverpool hi German club lian RB Leipzig hmachhawn turin Red Bull Arena-ah an lenglut a, Mimualah bul an tan tha viau. Reds tan hian Darwin Nunez chuan minute 27-naah Mohamed Salah siamsak atangin hmahruaina goal a thun. Nunez goal thun hi hun tawp thlengin an humhim a, Mimualah si khat faiin Liverpool hi an chak zui ta a ni.
English club lian Liverpool hi Dutch coach Arne Slot hnuaiah an khel tha viau a, season thara inelna hrang hrang an hmachhawn vawi 12-nah vawi 11 an chak tawh. Champions League-ah vawi thum an chak zawn tawh a. UCL season tharah vawi thum chak zawn thei pahnih chiah an awm a, chungte chu Aston Villa leh Liverpool te hi an ni