Manchester City an chak zo lo

Nilai zana UEFA Champions League khelhah English club lian Manchester City chu Monaco lakah an chak zo lova, 2-2 in an inhnehtawk. City an chak zawh loh lai hian German club lian Borussia Dortmund an khel tha chhunzawm a, an mikhual Sporting Lisbon an sawp ve thung.
Dal theih loh Haaland
EPL club lian Manchester City hi French club lian Monaco hmachhawn turin Stade Louis-II-ah an leng lut. Mikhual an nihna hmunah an khel tha viau a, tum hnih ngawt hmahruaituah an tang. Hmahruai bawk thin mah se hun tawp dawnah an vanduai a, penalty an chawi vangin an hmahruaina an hum zo lo.
Stade Louis-II a inkhel hmuhnawm takah tun laia goal thun reng mai Erling Haaland chuan minute 15 na lekah Manchester City hmahruaina goal a thun nghal. Hma takah goal chhuah mah se team lian lakah Monaco an buai zui lova, goal thunin an si phurh an sut thuai. Goal an chhuah atanga minute thum hnu lekah Jordan Teze chuan goal thunin an si phurh a sut a, minute 18 an inkhel tling chauh tihah 1-1 a ni nghal der.
Inhnaih chilh taka goal hnih a luh zawn hnuin goal lut a chawlh deuh det. Goal lut a chawlh deuh det hnuin Haaland bawk a inlar nawn leh a, chawlhlawk dawn hnaih minute 44-naah Haaland hian hma an hruai nawn lehna goal a thun. Club leh ram tana goal thun thei tak Erling Haaland hi dan theih a ni tak tak lo va, goal a thun tluang zel. Dan theih loh a nih miau vangin Haaland hian season thara inelna hrang hrangah goal 17 a thung tling hial tawh a ni.
Haaland goal hnihna hmangin City in hma an hruai reng a, mikhual an nihna hmunah an chak mai a rinawm hman viau. Goal a luh belh theih loh reng hnuin Monaco an vannei a, minute 90-naah penalty an hmu. He penalty hi Eric Dier chuan goal-ah chantirin an si phurh sut nan a hman. Dier goal thun hnuin goal dang a luh belh thei tawh lova, inkhel hmuhnawm tak chu 2-2 in a tawp ta a, uiawm takin Manchester City chu an chak zo ta lo a ni.
Manaco lakah chak zo lo mah se City hian khelh hnih atanga point li hmuin pariatna an luah a, Monaco hian khelh hnih atanga point khat hmuin table hnuai lam an luah ve thung.
Dortmund an chak
Nilai zana inkhel dangah German club lian Borussia Dortmund in an mikhual Athletic Club chu 4-1 in an lo sawp a, tlawm nei lovin an kal tluang.
Dortmund tan hian Daniel Svensson chuan minute 28-naah hmahruaina goal a thun a. Chawlhlawk hnu lamah Carney Chukwuemeka, Serhou Guirassy leh Julian Brandt ten goal an thun belh leh bawk. Spanish club Athletic Club tan hian Gorka Guruzeta chuan goal khat thun ve bawk mah se awmzia a nei thui thei tawh lo thung. Atheltic sawptu Dortmund hian khelh hnih atanga point 4 hmuin pasarihna an luah a. Spanish club Athletic Club hi khelh hnih an tlawm zawn ta thung a, table-ah 34-naah an awm mek a ni.
Nilai zan vek hian Italian Serie A champion Napoli chuan an mikhual Sporting CP chu Rasmus Højlund goal hnih thun hmangin an lo hneh ve bawk.