Manchester City in final an hnaih

January 13, Thawhleh zan khan English Carabao Cup semi-final thawhkhatna khelh a ni a. Manchester City chuan mikhual an nihna hmun St James Park-ah 2-0 in hnehna an chang. Mimualah goal chhuah lova hnehna an chan vangin City hian final an hnaih leh zual sauh.
St James Park-ah mualneitu Newcastle United leh Manchester City te an inhnehtawk viau aa, goal pawh a lut lawk thei lo. Goal thun tumin an innawr tawn nasa hle a, chawlhlawk hmain goal thun theihna hun tha pawh an nei ve ve. Hun tha nei bawk mah se an chhawr tangkai zo lo ve ve a, chawlhlawk hmain goal thun thei an awm lo.
Chawlhlawk hmaa goal lut a awm theih loh hnuin chawlhlawk hnu lamah goal a lut ta thuai thung. Minute 53-na lekah City player thar Antoine Semenyo chuan Bernardo Silva siamsak atangin hmahruaina goal a thun. Manchester City a zawm hnuin Semenyo a chetha hle a, vawi hnih khel tawhin goal hnih a thun der tawh. City tan a khelh hmasak ber FA Cup-ah goal a thun nghal a. Carabao Cup-ah goal a thun zui leh nghal a. Inrinni zana Manchester United an khelh hunah goal a thun zui leh a ni chuan City tan inelna hrang pathumah goal a thun nghal der dawn a, hnuhma tha tak a hnutchhiah ang.
Semenyo goal thun hnuin inkhel a hmuhnawm zui hle a, Newcastle United in an si phurh sut tumin tan an khawh zui nasa viau. Newcastle tan hian Yoane Wissa chuan a tauh goal teuh hle a, City si nghak James Trafford chuan pui zetin a lo dang hman hlauh thung a, an team a chhan him. Magpies tan hian captain Bruno Guimaraes pawhin goal a thun teuh viau a, goal post a pet per hlauh thung.
Newcastle United in an si phurh an sut theih loh reng hnuin City an vannei a, goal thun theihna hun tha an nei. Hun pek belh minute 90+8-ah Rayan Cherki chuan Aït-Nouri siamsak atangin goal a thun belh ta nge nge a, an hmahruaina a tizau. Cherki goal thun hnu hian goal dang a luh belh thei tawh lova, City chuan mikhual an nihna hmunah 2-0 in hnehna an chang zui ta a i.
Mikhual an nihna hmunah hnehna an chang a, an muala inlan zui leh tur an nih vangin City in final an hnaih leh zual hle. An mualah tlawm an pumpelh thei a nih chuan City hian kum 2021 hnu lama a vawi khat nan Carabao Cup final an lut ang a. Arsenal leh Chelsea te inkhela chak zawk zawk final-ah an hmachhawn ang.
Manager ropui Pep Guardiola hnuaiah City hi vul viau thin mah se season liam taah erawh beisei an phak lova, kut bengin season an khar. FA Cup-ah final lut bawk mah se Crystal Palace an hneh zo lo. Season liam taah an chet that loh vangin season kal mekah champion ngei tumin tan an khawh a. Trophy lian chawi thei dinhmunah an ding mek. EPL-ah pahnihna ni mekin Arseal hnaih bertu an ni. EPL-ah champion theihna hun tha an la nei a. FA Cup leh UEFA Champions League lamah pawh beiseina sang tak an la nei. City tan trophy hnaihna bertu English Carabao Cup hi a ni a, final lut turin a an dinhmun a tha viau tawh. Newcastle United paltlanga final an lut a nih pawhin final erawh a awlai dawn lova, Wembley stadium-ah Arsenal emaw, Chelsea emaw an tum a ngai dawn.
Nilai zan khan Arsenal leh Chelsea ten semi-final thawhkhatna an khel a, result kan tarlang hman lo.