Manchester City leh Palace an chak

Thawhlehni zan khan English Premier League khelh chhunzawm a ni a, inrinni zan FA Cup final a intum Manchester City leh Crytal Palace ten hnehna an chang ve ve. City hi pathumnaah an inhlangkai a, FA Cup champion Crystal Palace chuan an mikhual Wolves an hneh a, an mualah ropui takin champion an lawm nghal bawk.
Hun rei tak hnuah Trophy lak nei lova season khar tur Manchester City hian Etihad Stadium-ah AFC Bournemouth an mikhual a, an mualah 3-1 in hnehna an chang. An mualah an chak vangin City hi pathumnaah an inhlangkai a, pahnihna ni thei dinhmunah an la ding. Pahnihna ni turin an khingpui tur Fulham an sawp nek a, tlahniam tawh Southampton lak Arsenal tlawm a ngai ve dawn bawk.
City hian an mualah bul an tan tha a, goal an thun hma hle. Inkhel tan atanga minute 14-na lekah FA Cup final a penalty thelhtu Omar Marmoush cchuan hmahruaina goal a thun. Hma takah goal an thun vangin inrintawkna sang zawk nen an mualah an inlan a, chawlhlawk hmain Bernardo Silva chuan goal khat a thun belh leh a, si hnih faia hmahruai chungin chawlhlawk an hmang.
Second half-ah City an chesual hmasa a, an midfielder Mateo Kovacic chu minute 67-naah hnawhchhuah a ni. Tam zawk ni mah se Bournemouth in goal an thun thei mai bik chuang lo. Kovacic hnawhchhuah a nih hnu lawkah Bournemouth player Lewis Cook chu minute 73-naah hnawhchhuah a ni ve leh thung a, 10 ve ve an ni leh chiah. Lewis Cook hnawhchhuah a nih hnu hian si hniha hmahruai tawh City tan Nico González chuan minute 89-naah an goal thumna a thun zui leh a, an hmahruaina a tihzau belh. Si thum fai ngawta hnufual tawh Bournemouth tan hian Daniel Jebbison chuan minute 90’+6-naah zangnadawmna goal a thun. Goal dang luh belh lovin inkhel a tawp a, City in an mualah point thum an hmu.
Manchester City hian khelh 37 atangin point 68 an hmu a, pathumnaah an inhlangkai. Pathumnaah inhlangkai bawk mah se champions league khel turin an la tling chiang thei bik lo. Pathianni zanah Fulham an hmachhawn leh dawn a, an result a zirin pahnihna ni thut thei an ni a, an result a zir vekin top 5 huang pawh luah phak lo thei dinhmunah an ding tel bawk.
3-1 a AFC Bournemouth an hmachhawn tum hian season tawp ruala City chhuahsan tur Kevin de Bruyne chuan bul a tan a, home game hnuhnung ber a khel. Midfielder tha tak De Bruyne hian kum 2015 khan Manchester City hi a zawm a, kum 10 chhungin trophy 16 ngawt a chawipui a. City hi EPL-h vawi ruk ngawt a champion pui bakah an la champion ngai lohna Champions League-ah a champion pui nawlh bawk. Season tawp ruala contract hmang zo tur De Bruyne hian club dang pan turin City a chhuahsan tawh dawn a. Etihad Stadium-ah mualneitu player ni chunga inlanna hnuhnung berah hian minute 69-naah lakchhuah a ni a, Etihad Stadium a pungkhawm mipui ten zahna chibai bukin an thlah hlawm. De Bruyne hian City tan EPL-ah vawi 284 khelin, goal 72 a thun tawh.
Palace 2-1 Wolves
Thawhleh zana inkhel dangah FA Cup champion thar, season thara Europa League khel tur Crystal Palace chuan Selhurst Park-a an mikhual Wolves chu 2-1 in an lo hneh a. Point thum hmu chungin FA Cup champion an lawm. An mualah an chak zui leh vangin Palace Puja a fuh hle.
Crystal Palace hian an mualah an khel tha viau a, goal li ngawt an thun. Goal li ngawt thun bawk mah se goal chhuah hmasa zawkah an tang tlat thung. Inkhel tan atanga minute minute 24-naah mikhual team tan Emmanuel Agbadou chuan hmahruaina goal a thun. Wolves in goal an thun hmasa hi inkhel tihmuhnawm zualtu a ni a, Palace in an si phurh sut tumin an nawr na hle. Goal an chhuah atanga minute thum hnu lekah Arsenal player hlui Eddie Nketiah chuan goal thunin an si phurh a sut. Nketiah hian minute 32-naah hma an hruai letna goal a thun zui leh a, 2-1 a hmahruai chungin chawlhlawk an hmang.
Chawlhlawk hnu lamah mualneitu Palace an khel tha chhunzawm a, Ben Chilwell chuan minute 50-na lekah an goal thumna thunin an hmahruaina a tizau. Wolves tan hian Jørgen Strand Larsen chuan minute 62-naah goal thunin an si phurh sut then bawk mah se Eagles tan hian Eberechi Eze chuan minute 86-naah goal thunin hma an hruaina a tizau nawn leh a, goal dang luh belh a awm theih tawh loh vangin Crystal Palace hian 4-1 in hnehna an chang zui ta a ni.