Manchester City leh Villa chak lo

January 7, Nilaini zan khan English Premier League 2025-26 khelh chhunzawm a ni a, Arsenal tan thil lawmawm hlir a thleng a, an elpui lian te an chak zo lo vek. Arsenal elpui lian ber Manchester City leh an mikhual Brighton te chu 1-1 in an inhnehtawk a. Aston Villa leh Crystal Palace te an inhnehtawk bawk. An elpui liante an chak zawh loh thup vangin Arsenal tan champion theihna hun tha a inhawn zau belh deuh deuh zel.
City 1-1 Brighton
Table a hmahruaitu Arsenal hnaih bertu, team lian Manchester City chuan Etihad Stadium ah Brighton & Hove Albion an mikhual a, an chunga awm Arsenal hnaih leh zualna hun tha tak an nei. City hian an mikhual Brighton lakah goal thun hmasa mah se an mualah point thum an hlawhchhuak zo bik lova, 1-1 in an inhnehtawk a, uiawm takin point hnih an hloh.
Champion tuma tan khawh Manchester City hian an mualah bul an tan tha a, goal thn hmasa zawkah an tang. Na taka an khingpuite an nawr hnuin City hian chawlhlawk dawn hnaihah penalty an hlawhchhuak. He penalty hi City goal thun khawl Erling Braut Haaland chuan minute 41-naah a pet goal a, an hmahruaina goal a thun. Haaland hian season kal mekah goal a thun thei tluang zel a, EPL-a top scorer a nihna a nemnghet deuh deuh zel. Haaland goal thun hmang hian City in 1-0 a hmahruai chungin chawlhlawk an hmang a, an mualah point thum an hmuh a rinawm hman viau.
City in an mualah chak tum viau mah se team vangtlang Brighton in tlawm an tum bik hauh lo. Huaisen taka an khingpuite hmachhawnin, chawlhlawk hnu lamah an si phurh an sut ta nge nge. Brighton tan hian Kaoru Mitoma chuan minute 60-naah goal thunin an si phurh a sut. Goal khat ve ve an thun hnuin inkhel hmuhnawm zui viau mah se hun tawp thlengin goal dang a luh belh thei tawh lova, Manchester City leh an mikhual Brighton te chu 1-1 in an inhnehtawk zui ta a ni.
An mualah chak zo lo mah se Manchester City hian hmahruaitu Arsenal chu point khatin an hnaih leh zual a, an inkar an tizim hret. Gunners hian ningani zan khan champion lai Liverpool an mikhual a, an chak a nih chuan City nen an inkar hi point 8 zetin a zau tawh thung dawn. Liverpool lakah an chak zo lo a nih pawhin City an chak zo lo hi an tan resutl tha a ni tho thung.
Villa an chak zo lo
Nilai zana inkhel dangah Arsenal elpui lian, pathumnaa awm mek Aston Villa in hnehna an chang zo bik lova, mikhual an nihna hmunah Crystal Palace nen goal awm lovin an inhnehtawk.
Villa hian Crystal Palace lakah chak tum viau mah se an tlarhnung veng nasa tak Palace lakah goal thun tur khawpin hun tha an insiamchhuah thei bik lo. Inkhel hmuhnawm takah hun tawp thlengin goal lut a wam thei lova, uiawm takin point hnih an hloh. Palace lakah chak se Villa hian an chunga awm Manchester City an lehpel thei tur a ni a. An chak zawh bik loh vangin pathumnaah an awm chhunzawm a ngai ta thung.
Chelsea an tlawm
Hnehna chang a, hma lam pan beiseina neih vangin an manager ban mah se London club lian Chelsea in hma an la sawn thei chuang lova, nilai zana an khingpui Fulham hneh lovin an tlawm. An tlawm nawn leh vangin Chelsea hian hniam lam an pan hret hret.
Chelsea hian mikhual an nihna Craven Cottage-ah bul an tan chhe viau a, minute 22-na lekah defender Marc Cucurella hnawhchhuah a ni. Tlem zawk an nih hnuin minute 55-naa Raúl Jiménez goal thun vangin an hnufual a. Hnufual zawk ni mah se Liam Delap chuan minute 72-naah an si phurh a sut. An si phruh sut mah se minute 81-naah goal an chuah leh ta tho a ni.