Manchester khua chu a seng United chak dan mak, mawi leh duhawm

Pathianni zan khan English Premier League-ah inkhel ngaihven hlawh tak a awm a, Manchester derby khelh a ni. Etihad Stadium-a Manchester Derby-ah mak, mawi leh duhawm takin Manchester United in hnehna an chang. United an chak rual hian London club lian Chelsea pawhin hnehna an chang a, Blues hian hmahruaitu Liverpool hnaihin, pahnihnaah an insawh nghet.
Manchester khua chu a sen
Manchester City khelmual Etihad Stadium-ah manager thar Ruben Amorim hnuaiah phur taka inlan Manchester United an leng lut. Amorim enkawl Sporting Lisbon chuan champions league-ah City hi 4-1 in an lo hneh tawh. City laka Sporting pawh chakpui thei a nih vangin Amorim hniam City a ngam a, hnehna chang nawn leh turin inrintawkna sang tak nen a team a len luhpui. Mualneitu City lakah tlawm teuh viau mah se hun tawp dawnah ropui takin hnehna an chang let a, United in point thum hlu tak an hmu.
Inelna hrang hranga khel chhe zawn City hian an hmelma lian United lakah hnehna chan ngei tumin an mualah tan an khawh a, chak pawh an chak teuh viau, City tan hian defender Josko Gvardiol chuan minute 38-naah corner atanga ball kal tauh lutin hmahruaina goal a thun. Croatian defender tauh luh hmang hian hun rei tak chhung hma an hruai a, point thum an hmuh a rinawm hman viau. Chak thei dinhmuna ding an nih laiin City hi hun tawp dawn tepah an chesual zawn ta tlat thung a, inhnaihchilh takin goal hnih an chhuah.
City player ten tul lo takin ball an inpekual a, ho takin an chesual. Ball a inpeksual nangchingtu Amad chu Matheus Nunes chuan box chhungah chiang takin a titlu a, penalty a chawi. He penalty hi captain Bruno Fernandes chuan minute 88-naah inringtawk takin a pet goal a, an si phurh a sut. An si phurh an sut vangin United an phur hle. United an phur viau maiin City an hnual a, an talbuai zui ta bawk. United defender ball vawrh luh tha tak chu Amad chuah fuh taka a um tlang hnuin si nghak Ederson a pet kan hmasa zet a, harsa lo takin minute 90-naah hma an hruai letna goal a thun. Hun pek belh minute nga chhungin City in an si phurh sut tum viau mah se goal an thun thei tawh lova, an elpui lian Manchester United hneh lovin an tlawm zui ta a ni. City laka United an chak let hi a makin a ropui hle a, ngaihnawm thei tur ang bera thawnthu duanlawk ang hial a ni.
An mualah an tlawm vangin City hi palinaah an tlahniam a, khelh 16 atanga point 27 hmuin, an chung chiaha awm Nottingham Forrest chu point khatin an phak lo. An elpui lian City an hneh vangin United in hma an sawn hret a, 13-na atangin 12-naah an inhlangkai a, manager thar Amorim hnuaiah table laihawl an hnaih hret hret.
Chelsea an chak
Pathianni zana inkhel dangah Chelsea chuan an mikhual Brentford chu Marc Cucurella leh Nicolas Jackson te goal thun hmangin an hneh a, pahnihna an luah nghet. Chelsea tan hian khel tha tak Marc Cucurella chuan minute 43-naah hmahruaina goal a thun a. Hun rei tak chhung hma an hruai hnuin hmasawn chak tak Nicolas Jackson chuan minute 80-naah an goal hnihna thunin an hmahruaina a tizau. Mikhual team Brentford tan hian Bryan Mbeumo chuan minute 90-naah goal thun bawk mah se result a thlak danglam phak tawh lo.
An mualah an chak leh tak vangin Chelsea hian pahnihna an luah nghet a, hmahruaitu Liverpool nen an inkarah point hnih chiah a tla zep tawh. Blues hian Reds aiin khelh khatin an khel tam zawk thung. Manager thar Enzo Maresca hnuaia hmasawn tak Chelsea hi champion tura rinkai ni lo mah se champion thei an nihzia hnehna hmangin an lantir chiang deuh deuh zel.