Manchester United in sum la lut hnem
English club lian leh ropui Manchester United chuan season hmang chhe hle mah se 2024-25 season chhungin sum an la lut hnem a, an sum lak luh a pung hluai thung.
Manchester United hi season liam ta khan EPL-ah 15-na daih an ni a, kum 1973-74 hnu lamah EPL-a an chetchhiat ber tum a ni. EPL leh inelna hrang hrangah che chhe viau mah se sum an lak luh erawh a kiam chuang tlat lo thung. 2024-25 chhungin £666.5m zet an la lut a, hei hi kum khata an sum lak luh tam ber tum a ni.
United hian an kawrhmaa thuziak ‘Snapdragon’ atangin £333.3m zet an la lut a, an kawr sponsor tute atanga an sum lak luh hi an sum leh pai dinhmun titha hluaitu a ni. Hei bakah hian matchday revenue atangin £160.3m zet an la lut tling bawk. Kum hmasa lamah £33m hloh tling bawk mah se an inrenchem thar a, an hlep nei thei turin an bei nasa hle. An sum dinhmun a that theih nan an hnuaia hnathawk an ban then nual a, mi 1100 atangin tunah chuan mi 700 chauh an ruai tawh. Season tharah champions league an khelh phak loh vangin an player leh an hnathawkte hlawh 25% in an tihniam tel bawk. Nasa taka an beih rah an seng a, hlawkna an hmu ta nge nge a ni.
2024-25 chhungin La Liga club lian Real Madrid chu sum la lut hnem ber an ni a, £883m zet an la lut tling. Real Madrid hnuai chiahah hian Manchester City (£708m) an awm a, Champions league-ah a vawi khat nana champion Paris St-Germain (£681m) chu pathumna an ni a. £666.5m zet la lut Manchester United hi palinaah an awm.
Club ropui leh hlun Manchester United hi intuai thar leh tumin an indinthar leh mek a, nipui bazar liam taah khan Bryan Mbeumo (Brentford), Benjamin Sesko (RB Leipzig), Senne Lammens (Royal Antwerp) leh Matheus Cunha (Wolves) te chu an lak luh langsar zualte an ni a, player thar lei nan hian £156.8m vel zet an seng. Sum seng hnem thawkhat mah se season tharah beisei angin hma an sawn thei rih lova, 14-naah an awm mek. Inrinni zan hian Chelsea an hmachhawn zui leh dawn a, fiahna hautak an hmachhawn zui leh nghal a ngai dawn.