Manchester United leh City an chak

Nilai zana English Premier League khelhah Manchester khaw club lian pahnih; Manchester United leh Manchester City ten hnehna an chang. United chakpuitu hi tu dang ni lovin Harry Maguire ngei kha a ni.
15-naa awm mek Manchester United hian tlahniam thei dinhmuna ding mek Ipswich Town chu Old Trafford-ah an mikhual. An mualah chhe takin bul tan mah se tlem zawk ni chungin hnehna an chang let. An mualah harsa taka an chak vangin United hian table-ah pen khatin hma lam an pan hret.
Old Trafford a lenglut Ipswich Town hian beisei phak baka thain bul an tan a, inkhel tan atanga minute lina lekah Jaden Philogene chuan hmahruaina goal a thun nghal. Hma takah goal an thun vangin phur viau mah se Ipswich Town an phur rei lo. Amorim hnuaia result nei tha hleithei lo United hian mualpho pumpelh ngei tumin tan an khawh a, goal pawh an thun har lo. Na taka an mikhualte an nawr an hlawkpui a, mikhual player Sam Morsy chuan minute 22-naah an lamah a ti-goal palh a, United si phurh a sut sak.
An si phurh an sut hnuin United an khel tha zui viau a, goal an thun belh leh thuai. An si phurh an sut atanga minute li hnu lekah defender Matthijs de Ligt chuan hma an hruai letna goal a thun. United in hma an hruai let hnuin inkhel a hmuhnawm zui viau. Ipswich Town in an si phurh sut tumin thapui an thawh a, chawlhlawk hmain an hlawhtling. Minute 43-naah hlauhawm taka a chet vangin United defender Patrick Dorgu hnawhchhuah a ni. Dorgu hnawhchhuah a nih hnu lawkah mikhual team tan hmahruaina goal thuntu Jaden Philogene chuan minute 45+2-ah an goal hnihna thunin an si phurh a sut. Inkhel hmuhnawm takah hian chawlhlawk hmain chungnung zawk an awm thei lova, 2-2 a inhnehtawk chungin chawlhlawk an hmang.
Inkhel inbuk tawk takah tlem zawk an nih vangin United dinhmun a chhe hman hle. An mualah ngei an mualpho leh mai a hlauhawm hman hle. Dinhmun duhawm lo taka an din laiin chawlhlawk hnu lamah bul an tan tha ta viau thung. Second half tan atanga minute hnihna lekah defender Harry Maguire chuan hma an hruai nawn lehna goal a thun. Maguire goal thun hi hun tawp thlenga venghimin an chakpui a. An hnuaia awm mek Ipswich Town lakah harsa taka hnehna changin Red Devils chuan point thum an hlawhchhuak zui ta a ni.
Goal nen Haaland a kir
Nilai zana inkhel ngaihven hlawh takah Manchester City chuan Mimuala an khingpui Tottenham Hotspurs an hneh a, top 4 huangah an insawh nghet.
Tottenham Hotspur Stadium-a lenglut City hian bul an tan tha viau a, inkhel tan atanga minute 12-na leka Erling Braut Haaland goal thun hmangin hnehna an chang. Haaland hian hliam tenau a neih vangin City game hnuhnung pahnihah bul a tan thei lo. Champions League-ah Real Madrid an hmachhawn tumin bul a tan lova, ELP-ah Liverpool an hmachhawn tumin bench a luah lum hmasak bawk. Tottenham lakah bul a tan ve leh ta a, City chakna goal a thun zui ta a ni.
Result dang
Nilai zana inkhel dangah Brentford leh an mikhual Everton te chu 1-1 in an inhnehtawk. Mualneitu Brentford tan hian Yoane Wissa chuan minute 45’+4-ah hmahruaina goal a thun a. Everton tan hian Jake O’Brien chuan minute 77-ah goal thunin an si phurh a sut a, 1-1 in an inhnehtawk zui ta a ni.