Mani Shankar thusawi lui haichhuak

Congress leader Mani Shankar Aiyar chuan Pakistan chungchang a sawina chu tun hmaa mi tawh a nih thu sawiin BJP te mangangin Lok Sabha inthlan campaign laiin an haichhuak leh tiin a sawi.
“Ka thusawi tuna an haichhuaha an thehdarh leh mek hi thlasik tam tak kal tawh ami kha a ni a. BJP election campaign tlahniam zelah an beidawngin an haichhuak a ni. An game ang khelh ve ka hnawl hmak” tiin Congress leader chuan thuchhuah a siamah a tarlang a.
Video ah chuan Aiyar chuan India chuan atom bomb a neih ve tho avangin Pakistan chu a namnul tur a ni lo a ti a. “Zahna kan lantir ve loh chuan India lakah atom bomb an hmang duh mai ang” tiin a sawi a ni.
India muscular policy chungchang an zawhnaah, “Pakistan pawhin atom bomb Kahuta (Rawalpindi) ah a nei ve tih kan hriat a ngai” tiin a sawi bawk.

BJP leader ten chhang
BJP spokesperson Shehzad Poonawalla chuan Aiyar chu Congress ‘first family’ hnaih tak tia sawiin Congress party aiawhin Pakistan chakna a pholang a ni a ti bawk a.
“Pakistan kan rama firfiak te thawnlut rengtu chu chu zahna lantira inbiakna neihpui tur a ni a ti a ni,” tiin a sawi.
Union minister Rajeev Chandrasekhar, Thiruvananthapuram seat-a Congress leader Shashi Tharoor nena inkhing tur chuan Rahul Gandhi-a Congress ideology chu ‘tun inthlanah hian lailanin a awm’ tiin a sawi bawk a.
Uttar Pradesh Deputy CM Keshav Prasad Maurya pawhin Congress mipuite chu an ‘chi ai’ tia sawi bawkin, “Kum 2024 Lok Sabha inthlanah hneh an ni dawn tih an inhria a, Congress mite an chiai a ni. Indian military khawvela ammunition nei ngah bera rinna nghat lote chu India a cheng lovin Pakistan ah kal mai rawh se,” a ti bawk.
Union Minister Anurag Thakur pawhin Congress leader te chu India ramah an cheng a, mahse, an thinlung chu Pakistan-in a luah a ti bawk a. “Congress leader te chu India-ah cheng mah se, an thinlung erawh Pakistan a bet a ni. Pakistan hian eng huaisenna nge a neih? India chuan an phutawka chhanlet dan a thiam a ni” tiin Thakur chuan a sawi bawk.