Manipal Hospital-in mipui awlsam zawknan Aizawlah OPD hawn tum
Manipal Hospital-in mipui awlsam
zawknan Aizawlah OPD hawn tum
Manipal Hospital chuan anmahni pan duh Mizoram mipui tan Aizawlah OPD hawn an tum tih an sawi.
Manipal Hospital hotute chuan Kolkata-a an hmunpui kaltlangin, AMRI leh Medica Superspecialty Hospital hnung zuiin Mizoram atangin damlo 15000 chuang an enkawl tawh a, heng zingah hian Medica Superspecialty Hospital (Manipal Hospitals Network unit pakhat) a kal thlak hlawhtling 70 chuang an awm tawh tih an sawi.
Manipal Hospitals-a tel Medica Superspecialty Hospital hi kum 2017 atang khan Aizawl Hospital & Research Center nen an inzawm a, hei hian outreach clinics chu neurosurgery, respiratory medicine, orthopaedics, urology, nephrology & endocrinology ang chi specialty-ah kalpui a ni tih an sawi bawk.
Manipal Hospitals Department of Respiratory Medicine director Dr Debraj Jash chuan, thawkna lam natna, COPD, asthma, lung natna, leh hetiang kaihhnawih a hluar chho zel a, hun rei tak chhung enkawl an ngai fo thin tih a sawi a. Hmunpui pan turin harsatna an tawk a, hemi sukiang turin OPD-ah hetiang lam enna hi buatsaih an tum tih a sawi
Neurosurgeon and Spine Surgeon senior consultant Dr Harsh Jain chuan, Mizoram atanga damlo zingah a bik taka enkawlna mamawh an sang chho zel tih an hmu a, thluak natna, ruh natna kaihhnawih chu an theih chin clinic leh doctor rawn theih a, a hun taka enkawl leh a hnu lama inenkawlna tha zawk thlengin an buatsaih dawn tih a sawi
General Medicine and Endocrinology senior consultant Dr Kaushik Biswas pawhin zunthlum, hypertension, thyroid disorder leh metabolic syndromes a pung zel a, Manipal Hospital-ah hmarchhak bial atanga damlote enkawl an ni thin a, OPD an neih thin leh Mizorama damdawi in nen thawhhona tha tak an neih hmangin inenkawlna tha zawk leh damdawi tha zawk hmangin hriselna tha zawk thlen an tum tih a sawi a ni.
Tun tuma hma an lakna turah hian Civil Hospital nen thawkdun tur leh Association of Physicians of India Mizoram nen inthlunzawmin, specialty hrang hranga inenkawlna kawnga hmasawnna thar ber ber chu inhrilh tawn an tum tih an sawi bawk.