Manipur-a Naga-ten FMR hman thar leh phut

Manipur-a Naga-ten FMR hman thar leh phut
Manipur-a United Naga Council (UNC) chuan India-Myanmar ramria Naga chenna huam chhunga Free Movement Regime hlih tawh chu hman thar leh an phut a, kum 2016-a district pasarih siam chu thiah leh an phut bawk.
Manipur Governor Ajay Kumar Bhalla hnenah Zirtawpnia memorandum an thehluhah UNC chuan Ministry of Home Affairs-in February thlaa FMR hlip tura thutlukna a siam chu India-Myanmar ramri km 1,643 hrula Naga-te hnam chanchin, nun dan leh inthlah chhawnna tibuai theitu a nih thu an tar lang a. An pawl president, Ng. Lorho leh general secretary Vareiyo Shatsang ten hming an ziak.
FMR hi India leh Myanmar ramri atanga lehlam lehlama km 16 huam china tlang mite inkalpawh phalna a ni a, vawi khat tlawhah chawlhkar khat cham theihna niin kum khat chhung an border pass chu a dam bawk.
UNC chuan FMR hlih hian Manipur-a Ukhrul atanga Chandel district inkar leh Myanmar Sagaing Division-a Tangkhul, Anal, Moyon, Lamkang leh Maring Naga hnam chengten an tuar dawn tih an sawi.
UNC chuan Passport (Entry into India) Rules of 1950 ennawn leh kum 1952-a India-Burma Treaty siamah tlanga cheng hnamte chu ramriah km 40 chin thleng visa ngai lova intlawhpawh phalsak an ni tih tar langin ramri chu a bul hnaia chengte rawn hmasa lovin kum 1967-ah tihdanglam a ni ringawt tih an sawi.
“Kan nunphung leh khawsak dan hi ramria kan intlawhpawh theihna hian a siam a ni,” tiin UNC chuan an tar lang a, FMR hlih leh ramri hung chu United Nations Declaration on the Rights of Indigenous Peoples, 2007 Article 36 bawhchhiatna a nih thu an tar lang a. India chu he declaration-ah hian a hming ziah ve lo mah se a thlawp zawngin kum 2007 khan a vote tih an sawi.
Naga chen tamna, Chandel leh Tengnoupal district-a ramri km 80-a thui hung chu Convention on Migratory Species bawhchhiatna a ni tih an sawi bawk. “Hung hian mihring chauh a nghawng dawn lo va, ramsa pawh a tuartu niin hun bia pem thin ramsa lian leh a dangte inthlanpui pawh a tlem sawt dawn a ni,” an ti.
UNC hian Okram Ibobi Singh-a kaihhruai Congress sorkarin December, 2016-a district a siamah a cheng tak zawkte rawn an ni lo niin an sawi bawk.
Naga pawlten an duh loh district-te hi Jiribam, Kamjong, Kakching, Tengnoupal, Noney, Pherzawl leh Kangpokpi a ni a. Hengte hi Imphal East, Thoubal, Ukhrul, Senapati, Tamenglong, Churachandpur leh Chandel district atanga lak chhuah an ni.
Naga-te hian district siam duh lohna hi Naga tamna district-ah December 15, 2016 khan lantirin Imphal tlawhna kawngpui pawh ni 139 chhung an lo dang tawh a ni.