Manipur-a President’s Rule pawt sei

Manipur-a President’s Rule hman mek chu August 13, 2025 atanga chhiar tana thla ruk chhung atan pawh sei a ni.
President’s Rule kalpui mek pawt sei tur hian Union Home Minister Amit Shah-a’n Lok Sabha-ah pawh seina tur resolution pu lutin hei hi pawm a ni.
House hian pawh seina tur hi pawmpuiin, “He house hian February 13, 2025 atanga prsident-in Danpui Article 356 tlawhchhana President’s Rule kalpui tur puan chu August 13, 2025 atanga chhiar tana thla ruk chhung atan pawh sei a ni,” an ti.
Manipur-ah hian chi leh chi intihbuaina a chhuah hnuah rorelna chief minister-in bânna a thehlut a, rorel mumal theih a nih loh avangin President’s Rule-ah February 13, 2025 khan puan a ni.
Chi leh chi inkara buaina hi May 2, 2023-a high court thupek duh lova ‘Tribal Solidarity March’ neih atanga intan a ni a. Sorkar laipui chuan intibuai hnamte hi remna a awm theih nan vawi tam a dawr tawh.