Manipur-a sorkar din hunah tel lo turin Kuki MLA-te ngen

Manipur-a sorkar din hunah tel lo turin Kuki MLA-te ngen
Manipur-a Kuki hnam pawl hriat hlawh tak chuan an hnampui MLA-te chu an state-a sorkar din leh chu engtik hun pawh ni se tel ve lo turin an ngen.
Myanmar nena inrinaa awm hmarchhak state-ah hian Meitei-Kuki inkara buaina chhuakin kum hnih chuang awh tawhin February thlaa chief minister atanga N Biren Singh-a a bân hnuah BJP kaihhruai sorkar chu thiat rihin President’s Rule-in an awm mek.
Tun hnaiah BJP hruaitu thenkhat chuan mipui thlan chhuah ngei sorkar din leh an sawi ri mek.
Kuki Inpi Manipur (KIM) chuan Inrinni khan thuchhuah siamin an hnampui MLA-te chu Manipur-a sorkar thar din leh hunah tel lo turin an ngen.
Kuki hnam atang hian MLA 10 an awm a. May 3, 2023-a an state-a chi leh chi inkara buaina a chhuah hnu lawkah khan heng MLA-te hian thuchhuah siamin ‘inrelbawlna hran’ siamsak an duh thu an sawi.
“Kuki-Zo Member of Legislative (MLA) tumah Manipur-a mipui thlan sorkar a din hunah tel loh tura ngen an ni,” tiin KIM General Secretary Khaikhohauh Gangte-a thuchhuahah tar lan a ni.
KIM hian an thuchhuah hi Kuki hnam pawl an thawhpuite leh pawl hrang hrang telna pahnih, Kuki National Organisation leh United People’s Front hnenah an pe bawk a. Heng pawl hnih hi sorkar laipui leh state sorkar nena suspension of operation (SoO) agreement ziaktu pawl 25 telna an ni.
Meitei hruaitute chuan SoO ziaktu Kuki hel pawlte hian inkahhai hi remchanga hmangin an intilian mek niin an puh a, hun a kal zel chuan an puala ram nei tura tharum hmanga nawr thei khawpa chak an ni thuai dawn niin an sawi.
Kuki pawlte hi May, 2023 atanga intan buaina hi inawpna hran nei tura autonomous council emaw, assembly nei union territory emaw an neih theih nana an karna niin sawiin Meitei hruaitute hian Kuki pawlte hian Manipur atanga inlahranga ‘Kukiland’ din tumin kum tam tak an bei tawh niin an sawi.
World Kuki-Zo Intellectual Council (WKZIC) pawhin January 15-a Manipur-a governor thar awm tirha memorundum an thehluhah Kuki hnam hian ‘kum 1946-47 atangin’ state hran neih an ngiat tawh tih an tar lang bawk.
May, 2023-a buaina a chhuah hma pawh khan Kuki-te hian inrelbawlna hran ngiata nawrna, pun khawm leh sawiho an lo huaihawt tawh thin niin an sawi a ni.