Manipur-a Ukhrul district-ah silai a puak leh

Manipur-a Ukhrul district-ah silai a puak leh
Manipur-a Ukhrul district-ah Ningani khan hmun hrang hrangah Kuki leh Tangkhul Naga mi nia rin ralthuam keng pawl hrang hrangte inkarah silai hmeh puah a ni a, police-te chuan Mongket Chepu khua telin hmun thumah buaina a la awm zui zel tih an sawi.
Kuki hel nia rinhlelh leh Tangkhul Naga khuaa volunteer-te inkarah silaia inbeihnaah hian helho hian lian tak tak kengin tlai dar 04:00 velah Sirarakhong khuaa luh an tum a. Silaia inkahna hi minute 10 vel a ni.
Tangkhul Naga khaw pakhat, Sinakeithei khuaa Lungter tlangdungah pawh tlai dar 05:00 vel khan silai ri a awm bawk.
“Inzawm zata beihna a ni thei a, automatic assault rifles leh Kartoo (single-barrel gun) thawm kan hria a; mahse, tute nge inhnamhnawih tih erawh kan chiang thei lo. Silai puakah hian thi an awm hriat a la ni lo va, venhim hna thawktute erawh inrintir an ni,” tiin police officer pakhat, a hming tar lan duh lovin Hindistan Times hnenah a sawi.
Hetihlai hian Sinakeithei khua thuneitute chuan ‘Kuki firfiakte hian ni eng emaw zat kal tawha venhim hna thawktuten an tihchhiat tawh an bunker atangin kan khua hawiin silai an hmet puak’ tih an sawi bawk.
February thlaa zu ruih vanga buaina a chhuah hnuah Kuki leh Tangkhul Naga community-te inkarah hian buaina a awm reng a. He thil thlen hnu hian hnam hnih ta chenna in 50 chuang hal a ni.
Hemi hnuah hian February thla khan MLA pathum – Deputy Chief Minister Losii Dikho, Kangpokpi district-a Saikul MLA Kimneo Haokip leh Ukhrul MLA Ram Muivah te telin Litan Police Station-ah thutkhawp pawimawh neih a ni a, hnam hnih aiawhte pawh an tel a. He buaina hi hnam hnihte inkara zu ruih vanga thleng a nih thu leh tharum thawhna thlennaa inhnamhnawihte chu thubuai siamsak ni se an ti.