Manipur-a Zo hnahthlakte an ngawi

Manipur politics thawm a ring a, he state-a Zo hnahthlakte erawh an ngawi rih. Manipur chief minister a bang a, Meitei engemaw zat an lawm em em laiin Zo hnahthlakte erawhin thawm an nei rih lo.
Chawlhni khan Manipur chief minister Biren Singh a bang a, Meitei lamah pawi ti awm tho mah se lawm pawh an thahnem. Zo hnahthlakte erawh an ngawi a, Zo hnahthlakte tawrhnaa a meizanghlaptua ngaih Biren Singh-a bang mah se thawm an chhuah lem lo.
Manipur atanga thu dawn danin, Biren Singh-a a ban hian Zo hnahthlakte chu lawm tura ngaih a ni a, mahse lawm anga lan kha tul an ti lem lo. Zo hnahthlak MLA-te an ngawi a, mipui pawh an ngawi.
Manipur-ah hian Zo hnahthlak MLA 10 an awm mek a, Churachandpur district-ah paruk, Kangpokpi district-ah pathum, Chandel district-ah pakhat an awm. Paruk chu BJP an ni a, Kuki People’s Alliance-in MLA pahnih an nei. JDU-in MLA pahnih an nei a, anni hi BJP-ah an lut.
Manipur-a Zo hnahthlakte leh Meitei an indo hnuah Zo hnahthlak MLA-te hi chep takin an awm a, Biren Singh-a sorkar hian a hrek tih chu an sawi dan a ni. MLA-te’n MLA fund cheng nuai 200 an neih bak thil dangah Biren Singh-a hian a hrek a, hmasawnna hnathawh pawh a awm thei lo an ti.
Zo hnahthlakte hian Manipur atanga chhuaha inrelbawlna hran neih an ngiat a, hei hi an dinna a la ni reng. An buaina chungchanga an inbiaknaah India sorkar aiawhte’n Biren Singh-a hi bang ta se inrelbawlna hran hi in ngiat tho ang em tiin an zawt thin a, Zo hnahthlak lam hian he zawhna hi an chhang ngai lo. Chuvangin tuna a bang hi, an thil ngiat nen a inzawm theih avangin ngawih an chuh rih nia ngaih a ni.
Zo hnahthlak MLA-te an lawm turah ngaih a ni a, mahse tumah an tawng chhuak rih lo. Mipui lam pawhin lawm anga lan an tum lo a, Meitei politics buaina a nihna lai a awm avangin lo bengchhenpui kha tul an ti rih lo tih thu dawn a ni.