Manipur-ah boruak a sosang thar leh tan

Manipur-ah boruak a sosang thar leh tan
Manipur khawpui Imphal East district huamchhunga Lamlai assembly constituency hmun thenkhatah pathianni atang khan silai leh bomb hmanga inbeihna a thleng leh tana sawi a ni a, police bakah, BSF leh army awmte chuan heng mite nen hian an inkah thu an sawi.
Tlangchhip lam atanga hmun hniam zawnga silaite hi hmehpuah a nih avangin loneitu tam tak chuan phaizawla an buh hmunte an enkawl theih loh phah nia sawi niin, boruak a sosang thar hle nia sawi a ni.
Sorkar chuan hmun him lo zual nia a hriatna apiangah sipai a dah belh nghal zel nia sawi a ni a, Sanasabi, Sabungkhok Khunou leh Thamnapokpi te chu inkah nasatna hmun niin police te chuan an sawi.
Manipur-ah hian Meitei leh Kuki inkarah buaina a chhuak thar leh tan nia sawi niin, kar liamta khan Hmar nu pakhat chu Meitei te hian rawng takin an lo tihlum tawh a, Kuki lam hian a chhanlet nan ruahmanna hrang hrang an siam chho mek nia sawi a ni bawk.