Manipur-ah duh ang anga hming thlak khap

Manipur sorkar chuan pawl leh mimalte chu anmahni duhthua “districts, sub-divisions, hmun hming, institutions, leh institutions address” te thlak ngawt lo tura ngenin chutianga chetlakna chuan community te inkarah inhriatthiamlohna a thlen thei a ti.
He thupek hi Chief Secretary Vineet Joshi chuan tichhuakin mimal emaw pawlin emaw an duhthua hming an thlak ngawt a nih chuan dan anga hremna lekkawh a ni ang a ti a.
Kumin May 3 a tribal Kukis leh non-tribal Meitei te inkara buaina chhuah hnuah pawl thenkhatte chuan district hming te bakah hmun leh institution hming te hnam ziarang milin an thlak a ni.
Hetianga hmalakna hian thuneituteah harsatna nasa tak a siam a ni, tiin Chief Secretary thupek chuan a tarlang a.
“Civil society organisations, institutions, establihsments leh mimal ten district, sub-division, hmun hming, insittution leh institution address te an tlak ringawt tih State sorkar chuan a hria a ni,” tiin thupek chuan a sawi a.
“Hetianga hmalakna hi hnawl a ni a, State a hnam hrang hrang chengte inkarah intihthiamlohna thlen thei niin a bik takin tun hnaia All Tribal Students Union Manipur tena May 3 a Tribal Solidarity March an huaihawt hnua dan leh hrai lekkawhna lama harsatna thlen hnuah a ni zual,” tiin a tarlang bawk a.
State sorkar chuan hmingthlak ringawt chu a ngaihthutak thu sawiin a chhan chu inthenhranna te, dan leh hrai lekkawhna te khawihbuai thei a nih avangin a ngai thutak tak meuh meuh a ni a ti bawk a.
“Hetianga hma la leh thupek kalha chete chu dan angin an chungah hremna lekkawh a ni ang a. Central leh State sorkar thuneitute, management, institutions, establishments, autonomous body tinte pawh an hming leh address te signage a fel taka pholangin leh official communications, website leh document pawimawh te thupek mila siam ngei tura hriattir an ni,” a ti bawk a.
He thupek kengkawh tur hian district magistrate leh superintendents of police-te chu hma la tura tih an ni zui nghal bawk.