Manipur-ah judicial inquiry neih tur : Shah

Centre chuan retired high court judge kaihhruaina hnuaiah judicial commission dinin Manipur-a ethnic class chu a chhui chiang ang, tiin Union Home Minister Amit Shah chuan June 1-a Imphal-a chanchinthar lakhawmtute a kawmnaah a sawi.
Shah hian Meitei pawl 22 leh Kuki pawl 25 te Manipur a cham chhungin a hmu a, political leader 11 a hmu bawk a, relief camp-te a tlawh bawk.
“Governor chairman-na hnuaiah Centre chuan peace committee a din ang a. Chutah chuan industrialists, sportsperson leh civil society organisation aiawhte pawh an tel ang,” tiin a sawi.
Hei bakah hian retired IPS officer Kuldiep Singh kaihhruaina hnuaiah Inter agency unified command din a ni ang a, thleibik nei hauh lovin chhui chianna an kalpui ang a ti bawk a.
Case langsar zual parukte chu CBI ten an chhui chiang bik bawk ang tiin a sawi bawk.
Buaina avanga tuar chhungkua te hnenah relief and rehabilitation package Rs 10 lakh pek an ni ang a, hliam tuar leh property hloh te chhawmdawlna chu June 2-ah Home Ministry-in a puang ang, a ti bawk a.
Ration, medicine leh vegetable te leh mamawh pawimawhte sem darh turin camp hran din a ni ang tiin a sawi bawk a.
Temporary railway platform din a ni ang a, ni rei lo te hnuah hman theih niin chuta tang chuan ni tin mamawhte phurh luh a ni ang, a ti bawk a.
“Hill area-a chengte tan mi pakhat tan Rs 2000 lekin helicopter service kan kalpui bawk ang a. Airport pan nan an hmang thei ang a, inter State transport atan pawh an hmang thei ang,” tiin a sawi bawk.
Special medical team pathum ten Manipur an luh tawh thu sawiin panga dangin an luh belh ang a. Moreh, Kangkokpi leh Churachandpur te an pan ang, a ti bawk.
“Education ministry official te pawh Imphal-ah lutin zirna a tihbuai loh nan hma an la ang a, online education kalpui a ni ang a, ni hnih chhungin tihfel vek hman a ni ang,” tiin Union Home Minister Amit Shah chuan a sawi bawk a.
Manipur state chhunga petrol pump tin te chu mipuite harsatna chhawk zangkhai nan an inhawng reng tur a ni tiin Home Minister chuan a sawi bawk.
“SoS group te hnenah chiang taka ka sawi duh chu SoS pact bawhchhia an awm a nih chuan na taka hremna lekkawh a ni ang a, khauh taka kenkawh a ni bawk ang. Ralthuam kawl mekte an ralthuam te pe lut turin ka ngen bawk a. Naktuk atangin police ten combing operation an nei ang a, an ralthuam te police te hnenah an pe lut tur a ni,” tiin a sawi bawk.
Kum ruk chhung Manipur-ah remna leh muanna a awm tawh a, court thutlukna avangin inhriatthiam lohna thenkhat a awm a. Manipur-a group 15 te nen peace pact kan siam a ni, tiin a sawi bawk.
“Ralthuam tam tak lak let leh tawh a ni a, mipui pungkhawm an tamin silai hmeh puah hreh thin a ni a. Combing operation chu ralthuam te pek let a nih loh chuan tan a ni ang,” tiin a sawi bawk.
Amit Shah hian khua pasarih vel tlawhin chutah chuan meeting a neihpui zel a, a tlawh lai ngei pawhin district pahnihah chenna in tam tak halin a awm niin Muan Tombing, general secretary of the Indigeneous Tribal Leaders Forum (ITLF) chuan a sawi.
May 29 khan Shah hian Imphal a lut a, chutih lai chuan Chandel, Kangpokpi leh Churanchandpur district-ah te chenna in 900 chuang halin a awm hman tawh a, chenna in nei lo mi 4,750 vel an awm hman tawh a ni.
Amit Shah hi Home Secretary A.K. Bhalla leh Intelligence Bureau chief Tapan Kumar Deka te chuan an tawiawm a. Moreh pawh tlawhin he khua hi India-Myanmar border trade hub a ni a, Tamil, Nepali, Rajasthani, Bengali leh Punjabi community te thahnem tak awmna a ni bawk.
Shah chuan Manipur-a kum ruk chhung buaina awm tawh lo chu May thlaa court thutlukna siam atangin inhriatthiamlohnain a hrin tiin a sawi a.
March 27 khan Manipur High Court chuan State sorkar chu Scheduled Tribe list-a Meitei te dah luh an nihna tura rawtna kar li chhunga theh lut turin a ti a ni.
Chu chu Scheduled tribe pawl 34 te chuan dodalin May 3 ah Tribal Solidarity March huaihawtin hei hi baina chhuahna bul chu a ni ta a ni.
Amit Shah chuan Manipur-Myanmar border 80 km a thui chu pin phui vat a ni ang, a ti bawk.