Central leh Manipur State sorkar-te chuan hnam leh chi inkara buaina avanga nunna chan chhungte hnenah Rs 10 lakh zel pek tur tiin thutlukna an siam. Hei mai bakah hian nunna chan chhungte chu sorkar hna pek an ni bawk ang.
Zangnadawmnate hi Centre leh State ten an intumsem dawn niin officials te chuan an sawi bawk a. Thutlukna hi Union Home Minister Amit Shah leh Chief Minister N Biren Singh tena inkawmna an neihnaah siam a ni.
Officials-te chuan dawt thuthang thehdarh nasat avanga harsatna hrang hrang sutkian a nih theih nan telephone line bik siam tur an ti bawk a.
Shah chuan meeting neihnaah essential items heng petrol, LPG gas, buhfai leh eitur thil dangte chu a man sang lutuk tihhniam nana tam tham tak chhekkhawl turin a ti bawk a.
Home Minister Amit Shah hian Thawhtanni khan Imphal thlawk lutin a rual hian Home Secretary Ajay Kumar Bhalla leh Director of Intelligence Bureau Tapan Kumar Deka te pawh an tel a ni.
Amit Shah hian political leh civil society leader Meitei leh Kumi community amite hmu dawnin hei bakah hian buaina chhuah nasatna ber Churachandpur a tlawh bawk a.
Manipur buaina hi May 3 a Meitei community tena Scheduled Tribe (ST) status an ngiat duh lova ‘Tribal Solidarity March’ tribal mipui tena an huaihawt atanga chhuak a ni a.
He mi hma hian Kuki villagers te chu reserve forest ram atanga nawrchhuahin an lo awm tawh a, chuvang chuan lungawilohna tenaute kalpui a lo ni tawh bawk.
Manipur-a mihring cheng 53% te chu meitei nia ngaih niin Imphal Valley-ah an cheng ber a. Tribals- Nagas leh Kukis te chu 40% vel niin hill district ah an cheng thung.
-- Advertisement --
Hun duh rei dawn ti
Chief of Defence Staff General Anil Chauhan chuan Manipur-a harsatna chu a la kiam lo tia sawiin mahse hun rei lo te hnuah harsatna zualpui chuan kiam lam a pan a beisei thu a sawi a.
May 3-a buaina chhuah atangin Manipur-ah hian nunna chan 80 chuang an awm tawh a ni.
Pune-a 144th course of the National Defence Academy (NDA) passing out parade neihnaa a telpuinaa Manipur chungchang zawhnaah, “Kum 2020 hma khan Army, Assam Rifles te tirh luh an ni tawh a. Mahse, northern border lamah harsatna nasa zawk a thlen avangin Army te kan la chhuak zawk a, hel pawl hrim hrim chu huangtau lovin siam an ni,” tiin a sawi.
Manipur buaina hi ‘hel pawl kaihhnawih a ni lo’ tia sawi bawkin hnam pahnih te inbeihna leh law and order kaihhnawih a ni zawk, tiin a sawi bawk a. “Harsatna chinfel nan State sorkar kan pui a ni,” tiin CDS chuan a sawi bawk a.
“Armed forces leh Assam Rifles ten an thawk tha hle a, nunna tam tak an chhanhim a ni. Manipur buaina hi a la reh mai dawn lo va, hun eng emaw chen a la awh ang. CAPF (Central Armed Police Forces) te puihnain sorkarin a tihtur tiin harsatna chinfel a nih theih kan beisei a ni,” tiin a sawi bawk.