Manipur buaina avanga sahimna zawngtute puih dan tur ruahman

Manipur buai vanga sahimna zawnga Mizorama lutte enkawl dan tur ngaihtuah tura sawrkarin a ruat ‘High Level Committee on Internally Displaced Persons of Manipur in Mizoram’ chu Thawhtanni khan an chairman, Home minister Lalchamliana hoin an thukhawm a. Ei leh bar bakah tawmhulna nei lote pui tura an rel bakah zirlaite zir zawm theih dan tur te, sawrkar laipuia chhawmdawlna dil mek bawhzui dan tur te an rel. Chairman Lalchamliana chuan Manipur buai vanga Mizorama raltlan lutte dinhmun tlangpui a sawifiah a. Myanmar leh Bangladesh atangin tun dinhmunah raltlan 50000 chuang Mizoramin a dawngsawng a; Covid vanga state-in harsatna a tawh chuan ziaawm lam a pan mek laiin Manipur-a kan unauten harsatna namen lo an hmachhawn leh tih sawiin, “Kan hnuchhawn thiang loa, kan sawrkar sum dinhmun leh kan hmanraw neihte pawhin tuar deuh dawn mah se, kan unaute an nih bakah harsatna kan tawh laia Mizo tlawmngaihna nen hmangaih taka min lo tanpui a min lo thlamuantute an nih vangin theihtawp chhuahin kan buaipui zel dawn a ni,” a ti.
He Committee-a tel sawrkar department hrang hrangte bakah Central YMA, Mizoram Kohhran Hruaitute Committee leh Mizoram Journalists’ Association aiawhten hma an lo lak tawh dan an report a. Hmalak chhunzawm zel dan tura rawtna awmte ngaihtuah ho a ni.
Thukhawmte hian resolution – “Kan unau Manipur atanga raltlante hian ei leh bar leh tawmhulnaah harsatna an neih lohna turin theihtawpa tanpui zel nise,” tih an pawm a. Raltlan rawn lutte chhinchhhiahna mumal leh felfai taka siam turin data tha neih ngai an ti a, Information & CT Department-in Management Information System buatsaih se, an ti.
Chhungkhat laina belh tur neilote awmna tur sawrkar hmunhma hman mek bakah hmundang ngaihtuah belh nise, an ti a. Manipur buaina hian eng chen nge a awh dawn tih hriat a nih loh avangin sawrkar hmunhma bakah hmun remchang dangte pawh thlithlai lawk nise; raltlan zingah school naupangte chu zirna in hrang hrangah document phut loa admit turin School Education department-in thuchhuah a lo siam tawh ang deuhin, college zirlaite zir chhunzawm dan tur ruahman a tul thu sawi a ni. Raltlante hriselna endik a, uluk taka vil zui a that thu sawi niin, High Level Committee thurel bawhzuitu tur ‘Executive Committee on Internally Displaced Persons of Manipur in Mizoram’ in hma an la chhunzawm ang.
Committee hian chief minister Pu Zoramthanga’n Manipur atanga raltlante chhawmdawlna atana Prime minister Narendra Modi hnena sum a dil chu rang taka bawhzui tur intirh tha an ti a, raltlante chhawmdawlna kawngah tlawmngai pawl, kohhran leh mitinte inphalzau turin an ngen a ni.
The Aizawl Post-a tarlan tawh angin, Mizoram sawrkarin sahimna zawnga Mizoram beltute pui tur hian Home minister Lalchamliana kaihhruaiin ‘High Level Committee on Internally Displaced Persons (IDPs) of Manipur in Mizoram’ a din thar a; vice chairman ah minister Lalchhandama Ralte niin, member secretary-ah Home secretary H Lalengmawia a ni. Minister pathum – Lalruatkima, K Lalrinliana leh Robert Romawia Royte te, a kaihhnawih sawrkar department – Finance, Health & FW, GAD, DM&R, PHE leh UD&PA principal secretary/ secretary te theuh bakah Aizawl district bawrhsap, CYMA, MJA leh MKHC aiawhte an awm a ni.
Home secretary kaihhruaiin ‘Executive Committee on IDPs of Manipur in Mizoram’ din a ni bawk a. Member secretary-ah Home OSD -cum- joint secretary awmin, Police, P&E, PHE, Health & FW, FCS&CA, DM&R, School Education, Aizawl DC bakah Central YMA aiawhte an awm. He Committee hian High Level Committee thurel bawhzui kawngah chhawmdawl hna thawh kawnga sawrkar department/ agency te mawhphurhna tih hlawhtlin a nih theihna’n an enzui pui dawn a ni.