Manipur buaina hi BJP rawng diktak – MPCC

Manipur buaina hi BJP rawng diktak – MPCC
BJP sawrkarna Manipur-a buaina thleng mekah nunna chan an awm leh hliam tuar tam tak an awm te, mimal in leh sakhaw biakna hmun thlenga hal a, tihchhiat a ni chu Congress party chuan tha lo a ti hle tih sawiin, India ram innghahna pakhat, secularism rah beh tumna nia an hriat thu a sawi.
MPCC thuchhuak chuan, India ramah BJP-in sawrkarna a chan apiangin sakhaw kaihhnawih buaina, chi leh chi inkara buaina a hluar bik thin tih a sawi a. Tuna Manipura buaina thleng mek pawh India ram puma BJP rawng dik tak tarlannaah a ngai tih a sawi.
‘Manipur-ah hian BJP-in sawrkarna a chan atangin sakhaw hmun pawimawhte nekchep a ni a; hnam tlem zawk tlangmite nekchep tumna thlengin a awm chho ta zel a. Chu chuan he buaina hi a hringchhuak ta a ni,’ a ti.
Khawvel khawi hmun pawh nise, Zofate tawrhna reng reng chuan Mizoram mipui thinlung a ti na thin tih MPCC hian sawiin, Manipur buaina pawh Manipura hnam tlem zawk, tlangmi, Zofate nekchep tumna nia a lan avangin pawi a tiin, buaina tireh tur leh hnam tlem zawkte leh an sakhua humhim kawnga chak lehzuala hma la turin Manipur BJP sawrkar a ngen tih a sawi a ni.