MANIPUR CM N. BIREN SINGH BAN CHHAN

Familia Fanai Lal\ansanga
February ni 9, 2025, Chawlhni chawhnu khan Manipur Chief Minister N. Biren Singh chuan Manipur larsap A K Bhalla hnenah banna a theh lut a, a banna hi Larsap chuan a pawm a, a aiawhtu tur ruat fel a nih hma chu N. Biren Singh hi caretaker Chief Minister lo ni lailawk turin a ruat nghal a ni.
N. Biren Singh ban chhan hi a tawi thei ang berin sawi dawn ta ila;
1. Manipur BJP MLA leh BJP thawhpui party dang – NPF (Naga People’s Front) leh NPP (National People’s Party) MLA te zingah CM thlak duhtu an tam vang.
2. Meitei leh Kuki buaina chhuah tirh, May ni 3, 2023 khan tharum thawha buaina siam tura N. Biren Singha’n a fuihna thusawi nia an puh, leaked audio tape kha Central Forensic Science Laboratory chuan uluk takin an fiah a, Manipur CM N. Biren Singh thusawi ngei niin an hria a. He report hi an sealed a, Supreme Court a thleng tawh a ni. He thubuai hi Supreme Court-in a ngaithuah hunah N. Biren Singh hi thiam loh a chantir vaih chuan CM ni thei a ni tawh dawn lo hrim hrim a ni.
3. February ni 10, Thawhtanni hi Manipur Assembly Session neih tan tur ni a ni a. Manipur Congress party chuan he session-ah hian sawrkar rintawk lohna, no confidence motion put luh an tum a. Hetah hian CM N. Biren Singh laka lungawi lo BJP MLA eng emaw zatin no-confidence motion thlâwp zawnga ban an phar ngei rin a ni.
Heng boruak lian tak tak pathumte avang hian N. Biren Singh mutmu a tuah thei ta lo va. CM N. Biren Singh ban duhtu zinga mi, Speaker Thokchom Satyabrata Singh chuan kar liam ta khan New Delhi-ah BJP president J P Nadda a hmu a. Congress in no-confidence motion an put luh chuan a dal theih dawn loh thu a ruh lang rawtin a hrilh.
February ni 3 khan Manipur Rural Development and Panchayati Raj Minister Yumnam Khemchand Singh chu Delhi-ah kalin BJP hruaitute hnenah, Manipur CM hi in thlak loh vaih chuan Manipur sawrkar hi a tlu thei reng, tih a hrilh bawk. February ni 4 khan Manipur larsap A K Bhalla chuan New Delhi-ah Union Home Minister Amit Shah hmuin Manipur sawrkar ding lai dinhmun derdepzia a hrilh.
CM N. Biren Singh pawh a mawng a hung hman bik lo. Kar hmasa khan vawi hnih ngawt Delhi-ah a kal a, Home Minister Amit Shah a hmu thei lo va, Maha Khumb Mela-ah te a zuk inhnim vel ta mai mai a. Inrinni-a a zuk kal leh phei kha chuan a cabinet minister-te tu mah a hruai lo. Home Minister Amit Shah leh BJP President J P Nadda te nen darkar 2 lai thukhawchang an sawi hnuah Chawlhni chawhnu khan Imphal lamah BJP Northeast Coordinator Sambit Patra nen an lo thlawk haw leh vang vang a.
Chutichuan, Chawlhni tlaiah N. Biren Singh chuan Sambit Patra leh senior Manipur BJP hruaitu – cabinet minister; Th Biswajit Singh, Sapam Ranjan Singh, Govindas Konthoujam leh Th Basanta Singh te nen Larsap Ajau Kumar Bhalla an hmu a, banna a theh lut ta a ni. Hetianga banna a theh luh takah chuan Larsap chuan Thawhtannia Assembly Session neih tur pawh a sut leh ta nghal a ni.
A tawp nan thu kam khat chauh
Manipur buai lai khan kan nau Thang Khan Suan Tunglut, retired SBI Manager, Churachandpur thusawi, “Manipur ram a buai a, Manipur rama Zo hnathlakte hian khawvelah Mizoram bak thlamuang taka awm theihna ram kan lo nei reng reng hlei nem maw le,” a tih kha ka rilruah hian a la cham reng mai.