Kangmei chhuak tur ven

Kangmei ven hapta (Fire Prevention Week) chu nimin atang khan kan hmang tan leh ta. Fire Prevention Week hi Mizoramah kum 2000 atanga hman tan niin, 2009 atangin district leh village level fire prevention award sem tan a ni a, kuminah pawh hian award hi sem leh tum a ni.
Tunhma deuh khan, Aizawl khawpuiah tui semtuten an hna an thawk tha tawk lo deuh a niang, mipui lam atanga sawiselna thawmin ram hruaitute beng a thleng a. Engtia chinfel nge tha ang tih ngaihtuahnaah, ‘tui sem tha award’ siam rawtnate pawh a lut a ni awm e. Mahse, award kha siam a ni ta em lova.
Sawrkar rawih hnathawktuten an mawhphurhna an hlen chhuak tha lo a nih chuan, an hna thawk tha tura zilh a, an zawm duh lo a nih chuan hna thawk tha lo hremna kha an chungah lek mai tur niawm tak a ni a. Hna an thawh that beiseia award tawktarh kha a kawnghmang vak lo a ni.
Kangmei ven award hi chu, sawrkar hnathawk ni lo, mipui kaihhnawih a nih avangin award han siam pawh thil tihawm tak chu a ni awm e. Chutih rualin, mahni ram venhim nana tha thawh hi chu khua leh tui duty pakhat a ni sa ve hrim hrim a, mipuiin tha an thawh ang a, sawrkarin a senso leh hmanrua a thawh ve thung tur niawm tak a ni.
Thil dangah pawh ram leh hnam himna atana mipui leh sawrkar thawhhona tha siam hi a pawimawh lai ber a ni hrim hrim. Sawrkar kan tih hi mipuiin ram leh hnam rawngbawl hna thawk tura kan aiawha kan thlan tena an kalpui a ni a, an kuta thuneihnate pawh hi, mipui pek a ni a, mipuiin an pek a nih avangin ‘thunei’ takin an awm a ni. Mipuiin an thlan tawh loh hnuah chuan, a hmaa an thuneihna ang kha an nei chhunzawm reng thei tawh lo thin a nih hi. Chuvangin, sawrkar hi mipui pawhin dah hla lo ila, a neitu nih thiam hi kan zir a pawimawh. Kangmei chhuak tur ven hna chungchangah pawh, mipui lamin theihtawp kan chhuah tur a ni, chutih rualin ram venhim hna thawhna atana tul mamawh reng reng chu sawrkar lam pawhin a thehchhuak ve tur a ni. Chu chu kangmei chhuak tur venna atan pawh a sawtin awmzia a nei thui zawk ang. Kangmei tichhuak thinte hi ramhnuaia kal an nih avangin, kangmei chhuak tur vengtute pawh ramhnuaia an awm tam a ngai, indaih a ngai, chu chu sawrkar hnathawkten an tlin lo, mipui kan inzarpharh a ngai. Sawrkar pawh, thal khawro hun lai, kangmei chhuah awlsam hun lai hi chuan insengso ve mai rawh se; award hi chu innghah nan bera hman chi pawh niin a lang lo.