Manipur Governor tharin chetla nghal

Manipur Governor tharin chetla nghal
Manipur Governor nihna a chelh tuk lawkah Ajay Kumar Bhalla chuan security review meeting nei nghalin State police te chuan atul a nih chuan National Security Act, 1980, trial awm hauh lova kum khat chuan mi man te hren theihna chu misual leh buaina siam tute lakah hman dan ngaihtuah ni se a ti niin senior government official chuan a sawi.
He unified command meeting ah hian Security Adviser Kuldiep Singh leh Director-General of Police Rajiv Singh te pawh telin Manipur Chief Minister N. Biren Singh erawh a tello thung.
Bhalla chuan thalai kalsual te tana eizawnna remchang siam dang tur ngaihtuah nise ti bawkin hei bakah hian security agencies te chu State a buaina tialhtu nia ngaih rinhlelh te chhinchhiah turin a ti bawk.
Central Reserve Police Force (CRPF) leh Border Security Force (BSF) te chuan Meitei hel pawl upa ber United National Liberation Front (UNLF) te chuan November 29, 2023 a Union Home Ministry leh Manipur government tena peace agreement an siam chu an zawm lo an ti a. UNLF te hi Manipur inlakhran duh niin Myanmar a bu khuar an ni.
“Governor of Manipur, Ajay Kumar Bhalla chuan security meeting, Raj Bhavan, Imphal ah ko vin State a dan le hrai lekkawhna chungchang sawihona neih niin a bik takin border areas te thlurbing a ni” tiin Raj Bhavan chuan X ah post siamin hetah hian CRPF, BSF leh Assam Rifles te pawh an tel thu a tarlang bawk.
Yaingangpokpi (YKPI) Imphal East chu valley leh hills buffer zone chu tun hnaia Manipur a buaina chhuah tamna a ni a. December 24 hnu atang khan helai chhehvelah hian silai kahpuahna tum 50 chuang a thleng tawh niin sorkar official te chuan an sawi bawk.
YKPI atanga 60 km a hla daiha awm Kangpokpi ah January 3 khan buaina chuakin Kuki-ZO Body Comittee On Tribal Unity (CoTU) tena December 30 a Central Armed Police Forces (CAPFs) tena camp an din chu hnukkir turin an nawrna lamah buaina a chhuah avangin Superentendent of Police (SP) chuan hliam a tawrhphah a ni.
Official te chuan YKPI chu kawngkhatah National Highway 202 (Imphal-Ukrul) in hualin a lehlamah Khamenlok-Gwaltabi reserved forest in a hual bawk an ti a. helai hmun hi Kuki-Zo voilunteer tena bunker an dinna niin buaina tamna tiin an sawi bawk a. December 30 khan Central security forces te chuan Saibol camp a bunker siam te an tichhiaa chu chu duh lovin helai cheng hmeichhia te chuan lungawilohna lantirin CAPF personnel te nen inbeihna a thlenga mi tam takin hliam an tawrhphah tiin an sawi bawk.
YKPI hnaiah tho hian Kuki-Zo hel pawl leh Meitei hel pawl UNLF te chuan camp an nei tia sawi a ni bawk.
December 24 khan Imphal East valley district a bunker atangin Kuki-Zo areas tlangram kah a ni a, chuvang chuan inbeihna htleng zuiin December 29 thleng inkahna a thleng a. A hnuah joint combing operation neih niin YKPI bul hnai Phaimol a Kuki-Zo village volunteer te bunker siam paruk chu tihchiat a ni tih a ni bawk.
“Phaimol leh Urangpat ah te Kuki-Zo bunker te chu an awmna a san zawk avangin Meitei te chuan dinhmun chhe zawkah an inngai a, hei vang hian bunker te chu tihchhiat an ngiat a ni” tia sawi a ni bawk.
June 2023 atang khan valley areas Meitei te chenna leh tlangram Kuki-Zo te chenna inkarah buffer zone siam a ni a, heng buffer zone te hi CAPF personnel ten an veng a ni.