Manipur-in December-ah relief camp khar hman vek tum

Manipur-in December-ah relief camp khar hman vek tum
Manipur sorkar chuan an state-a chi leh chi inkara buaina chhuak avanga mahni ina cheng ngam lote khawsakna atana relief camp an siam chu December-ah an khar vek an tum a. Hemi atan hian a awm mekte chu a tahtawlin, July thla atang hian thawh thumin an haw lehna an kalpui tan dawn.
Chief Secretary Prashant Kumar Singh-a chuan Manipur State Commission for Scheduled Tribes dincham kum hnihna lawmna, Imphal-a thu a sawinaah relief camp-a awmte hi hun tiam chhunga an ina an haw leh hman lo emaw, an thei lo emaw a nih chuan awmna tur in thar an saksak dawn tih a sawi.
July thla atanga haw lehna tur bul tan hi October leh December-ah thawh dang an kalpui dawn tih a sawi bawk.
May, 2023 atanga Imphal Valley-a cheng Meitei leh an thenawm tlangrama cheng, Kuki-Zo hnam intihbuainaah hian mi 260 chuang thi tawhin mi 1,500 vel an hliam a. Mi 70,000 vel mahni ina khawsa ngam lovin an tlanchhia.
Sorkarin a chhinchhiahah chhungkaw tam tak an kir leh tawh a, chhungkaw 62,000 atangin 57,000-ah a tla tawh a. Hawna tur in nei tawh lote tan in 1,000 sak hna thawh mek a ni.
Singh-a chuan an buaina chhuah laia an in tihchhiatsak chhungkua, an khuaa kir leh duh site chu thawm that nan sorkarin Rs. nuai 1.3 leh sak thar ngaite chu Rs. nuai 1.7 a pe dawn tih a sawi.
State leh sorkar laipui chuan zalen tak leh him taka inkalpawh a nih theih nan kawngpui pawimawhte pawh hawn a tum tih a sawi a. “Tun anga hmasawnna a awm a nih chuan kawngpui pawimawh bikte chu zalen taka zawh leh theih thuai a nih a beiseiawm,” a ti.
An state chhunga himna dinhmun sawiin Singh-a chuan, “A ziaawm hret hret zel a. Lehlam lehlama mipui telna pawlte pawh zaidawha min thawhpui turin ka ngen a. Thil thleng tenau chu a la awm reng thei a; mahse, a pum puia lak chuan hma lam kan pan a ni,” a ti.
Prime Minister Narendra Modi-a’n a tlawh dawn tih thu thang awm mek pawh chief secretary chuan sawi langin engmah sorkar atanga tihchianna a la awm lo tih a sawi a. “Hetih rual hian Manipur leh hmarchhak state dangah hmasawnna ruhrul din hna thawhte thawh zawh tam tak a awm tawh a, tih dan pangngaia hawn hun kan nghal mek a ni,” a ti.
Singh-a hian Guwahati, Assam-a Unique Identification Authority of India (UIDAI) teamin Aadhaar-a inziah luh enpui turin an state an tlawh dawn tih a sawi bawk.
Kum hnih chuang chi leh chi inkar buaina chhuakin a tuam hnuah pawh Prime Minister Modi-a chuan Manipur hi a la tlawh lo va, sawiselna pawh a tam phah a. Tun thla tawpah a tlawh dawn niin thu a thang mek a, chief secretary erawh chuan engmah tihchian a la awm lo a ti.
“Prime minister a lo zin tur chungchang hi engmah hriattirna kan la dawng lo va, kan beisei a; mahse, engmah sawi thei a la awm lo,” a ti.
Tun hnaiah chanchinbu thenkhat chuan high-level meeting vawi hnih neih a ni a, pakhat chu Union Home Secretary Govind Mohan kaihhruai niin pakhat hi Manipur Governor Ajay Bhalla kaihhruai a ni a, hetah hian prime minister-in a tlawh hun tur an sawiho niin an tar lang a. Venhim hna thawktute pawh an inbuatsaih tan nia tar lan a ni bawk.
Modi-a hi Nilaini atang khan ram panga tlawhin a zin mek a, Nilainiah a lo haw dawn a. Parliament fur thutkhawm chu July 21 leh August 12 inkarah a awm zui bawk ang.
Ram chhunga buaina nasa tak a awm lai leh thi tam tak awma mi tam tak manganga an awm laia prime minister berin a la tlawh lo hi eptute titi lian a tling mek reng.