Daido kaltlanga Manipur kalna kawng siamthat mek chu ningani khan MLA Dr L Thangmawia chuan a hmunah tlawhin, Manipur ramri Vawngkawt a thleng.
Vawngkawta hun hmannaah Dr L Thangmawia chuan, he kawng hi luipui kan ngai loa Manipur kal theihna awmchhun a nih avangin chief minister Pu Zoramthanga’n a ngaipawimawh hle a, a siamna tur hian North Eastern Council atangin cheng vaibelchhe 33 a dilchhuak tawh a, mahse tihfel ngai a la awm nual avangin sum hi a la hman theih rih loh a. Chutih laiin Manipur buainaah he kawng hi hman a tul avangin kawng hlui awmsa hmanhmawh taka cheithat lailawkna tur chief minister hian sum zawng chawpin, kumin fur laia lirthei tlan theihna’n siamthat hna hi June 7 atang khan thawh tan a ni, tiin a sawi.
He kawng hi Manipur lam chuan kum 2021 khan ramri chin rawn lai thleng tawhin, blacktop hna pawh an thawk zo tawh a. Mizoram lam km 3.15 vel siamthat hmanhmawh ngai bik a awm tih a sawi a ni.
MLA tawiawmtu, Adviser to CM Er. K.Lalsawmvela chuan Manipur panna kawng dang, Lengteng bial kaltlanga NH 102B-a Tuivai lei hlui foundation siamthat hna pawh chief minister-in NHIDCL a ngenna angin kumin May khan zawhfel a ni a. Tuivawl bial kaltlang NH 150 (Tipaimuk Road) a Tuivai lei pawh tunah hian lei hluihlawn tawh chakte lakhawmin siam tura hma lak mek a ni tih a sawi.
Manipur kalpawhna kawng siamtha
Get real time updates directly on you device, subscribe now.
Prev Post