Youtuber-ten Mizo tawng dik leh thu belhchian dawl hmang ang – I&PR minister Social media hmanga thu thehdarh thin, a bikin mahnia channel nei Youtuber-

Social media hmanga thu thehdarh thin, a bikin mahnia channel nei Youtuber-te chu Mizo tawng dik hman kawngah leh thu belhchian dawl chauh tichhuak tura fimkhur turin Information & Public Relations minister Lalruatkima chuan a chah.
I&PR department leh Information & Communication Technology department tangdun chuan social media kaltlanga thu thehdarhtute pualin “Media Workshop for Youtubers & Related Media” an buatsaih. Mizo Youtubers’ Association aiawhte leh Youtuber dangte bakah political party hrang hranga Media Cell aiawhte, tlawmngai pawl hrang hranga media lam buaipuitute an tel.
Workshop hawngtu I&PR minister chuan naupang leh kum upa lam thlengin inawmtleina atan social media, a bikin youtube kan hmang nasa a, Politics leh Pathian thu bakah nitin khawsak chungchang atanga zeldin thawnthu thlenga thlir tur leh ngaihthlak tur a awm tawh avangin kan chhungkaw nun bakah kan khawtlang nun, kan inthenawm khawvenna thlengin hlawk zawka kan chhawr dan tur zirchhuah a beisei tih a sawi a ni.
Mizoramah social media content creator engemawzat kan nei ve tawh a, an thu leh hla an ngaithlatu an tam tawh avangin an thuchhuak ten nasa takin an rilru leh ngaihtuahna a nghawng thei a, chuvang chuan fimkhur lehzual a ngai tih sawiin, “Kan tawngkam hman chungchangah pawh Mizo tawng dik kan hman rualin tawngkam hawihhawm kan hman a tul hle a, chanchinthar thehdarh hmasatu nih a pawimawhin a chakawm thin a, chutih rual chuan thu belhchian dawl leh rintlak ngaihchan phawt a tul thin. Midang nun va khawihchhe vek thei thil leh thalai rilru thianghlim tak takte a ni lo zawnga hruaikawi thei thil kan thliar hran thiam a pawimawh,” Lalruatkima hian a ti.
Mizote chu hnam rinawm tak leh fel tak kan nih rualin, fel lohna pawh kan nei a, kan fel lohna leh kan that lohna lam phochhuah ai chuan kan thatna leh kan felna, a tha lai kan phochhuah tam phawt chuan zawi zawiin mi rilru a hneh anga, kan rilru sukthlek pawh min thlak danglam sak vek thei dawn a ni, tiin, sawrkarin inkaihhruaina leh dan a zamte bakah journalist-te inkaihhruaina dan awmsa te kan zawm hram hram hian kan him bakah midangte tan pawh malsawmna thlentu kan ni zawk thin tih I&PR minister hian a sawi a ni.
Workshop-ah hian thupui hrang hrang hmangin mithiam sawm bik mi pali in paper an buatsaih zirho a ni a. “Politics boruak tha thlen tura social media pawimawhna – Prof. Malsawmliana, secretary MPF Gen. Hqrs; “Social media hmangtute mawhphurhna” – Irene Lalruatkimi, news editor, Regional News Unit All India Radio Aizawl; “Social media thatna leh chhiatna : Mizote hmasawnna atan” – Lalengzuala, informatics officer, ICT department; “Social media kaihhnawih dan pawimawhte” – Zonunsanga, Addl. SP, CID (Crime) te niin, zawhna chhan a nih bakah sawiho a ni bawk.