Manipur Zofate tanpuina thawn

Central YMA president Lalhmachhuana chuan Manipura Zofate tanpuina thilpek chu Inrinni khan a vailiam.
Zofate Inpui leh Jerusalem chu Mizoram a ni a. A chhunga cheng Mizoram mipuiin hmun hrang hranga Zofate harsatna tawh an hrereng a, an tuamhlawm zel dawn, tiin Central YMA president hian a sawi a. Harsatna an tawhte chu a tha zawnga inpumkhat zualnan Zofaten an hman a tul tih a sawi bawk.
Myanmar, Manipur leh Bangladesh tualchhung buaina avanga Zohnahthlak harsatna tawk mekte tanpui nan hmun hrang hrang atangin Central YMA hnenah tanpuina a lut thin a. Tun thlenga an hnena tanpuina lut tawh hi cheng nuai 236 a chuang tawh. Hemi atang hian cheng nuai 167 chuang pek chhuah tawh a ni a. Tunhnaiah Mosia Agency Aizawl chuan tanpuina sum nuai 2.3 an pe.
Tun tuma tanpuina vailiam hi buhfai bag 100, thawmhnaw lum engemawzat leh mutbu te a ni.