Mansfield squad list-ah lung in tang mek Akins an telh!
Mansfield squad list-ah lung in tang mek Akins an telh!
League One club Mansfield Town chuan car khalh fimkhur loh vanga cyclist thih phah vanga lung in tang mek an player Lucas Akins chu a tan hun a tawp hnaih tawh avangin tun season-a an squad list tharah an telh.
Huddersfield Town, Burton Albion, Tranmere, Stevenage, Hamilton Academical leh Partick Thistle tana lo khel kual hrep tawh footballer Akins hi March 2022 khan a Mercedes G350 khalh chungin Huddersfield bulah a leu vel zak zak a, vanduaithlaktakin, bicycle nena teihawi ve mek kum 33 mi Adrian Daniel chu a su palh a, ni 10 hnuah a mi sut hi a thi zui ta a ni.
Thubuai ngaihtuah a nih chhungin kum 36 mi Akins hian Stags tan la khel chhunzawm zel mah se thla 14 chhung lung ina tang turin kumin April thla khan jail-ah dahluh a ni a; Stags boss Nigel Clough chuan chuti chen chen tang tura Leeds Crown Court-in thutlukna a siam ta maiin club a den nat thu a sawichhuak nghe nghe.
Hremna hi heti zat hi ni mah se lung ina a tan hun chhung tak hi chu thla sarih chauh a ni dawn a, a zatve dang hi chu car khalh phalna license hlihsakin a tlak thei dawn a, chuti a nih tak avangin tun season-a inlan tur Mansfield Town squad list an telh zui ta tho a, jail a chhuahsan rual rualin a career a chhunzawm leh thei dawn a, kumin Krismas hmain League One club tan a inlan leh hman a beiseiawm.
English Football League website-a squad list tarchhuah zinga lang chinte chu club vawn lai nei, contract la nung, season thar atana chhawr theih registered player an nih tihna a ni a, jail chaw bar mek mah se Akins pawh hi registered player a la ni reng tihna a ni.
Mansfield thuchhuah chuan lung in atanga a lo chhuah hunah an club-a Lucas-a dinhmun zel tur an ngaihtuah chauh tur thu an tarlang a, tun dinhmunah comment an pe thei lo tih an sawi.
Burton Albion chhuahsana January 2022-a Mansfield a zawm hnuah Akins hian a club vawn lai tan match 150 chuang khel tling tawhin, Burton-a a khelh laia an coach chu tuna Mansfield Clough tho hi a ni nghe nghe.