Maoist awmna district 11 chauh awm tawh

Maoist awmna district 11 chauh awm tawh
India-in kum tam tak chhung Left Wing Extremism (LWE) a beihna chu a tawp hnai ta hle niin sorkarin a sawi a, home affairs ministry chuan parliament rorel inkhawm mekah Maoist-ten buaina an siamna thin district chu kum 2014-a 126 ni thin chu tunah chuan 11 chauh a ni tawh tih a sawi.
District 11 zingah Maoist hel pawl chet tam zualna phei chu district pathum chauh a ni tawh niin a sawi a. An awm tawh lo tia chhiar zinga district 27-te erawh la enthlak zui ngai an la ni rih tih an sawi bawk.
Kum 10 liam ta chhungin Maoist chetna hi a tlahniam hle a. An chet nasat vang lai, kum 2010-a tharum an thawhna thleng zat atanga chhut phei chuan tunah chuan 89% zetin a tlem tawh zawk.
Thihna an thlen pawh 91%-a tlem tawh zawkin kum 2014-a civil mi thi 222 awm chu kum 2024-ah chuan 61 chauh a ni tawh a. Venhim hna thawktu thi pawh 88 atangin 32-ah a tla bawk.
Tar lan fo tawh thin angin sorkar laipui hian India ram chu March 31, 2026-ah chuan Maoist awm lohnaah siam tumin hma a la mek a ni.
Nilaini khan CPI (Maoist) commander leh an thuihhruai mi 11, an luman belhkhawma Rs nuai 82 man chu Maharashtra-a Gadchiroli police hnenah Director General of Police, Maharashtra, Rashmi Shukla hriatpuinain an inpe leh a. Kuminah mi 2,167 inpe awm tawhin man 942 zat let aia tam an inpe a ni.
Kum 2023 leh 2025 inkarah inpe 3,424 awmin man 2,956 an awm bawk a, tun hma lam nena khaikhinin man aiin anmahni duhthua nun pangngaia nung tura inpe hi an tam zawk zel tawh.
Man aia inpe an tam ta zawk an pawl hi an rawih telh telh a, an mamawh lakna a chat a, an pawla tel tura inpe an vân ta hle tih a lantir niin union home ministry chuan a sawi.
Sorkarin Maoist awm lohna ram din tuma hma a laknaah hian kum 2015 khan National Policy & Action Plan duangin a che nasa a. Thuang thumin hei hi kalpui a ni tih ministry chuan a sawi.
Venhim hna thawktute tihchak nan police station 656 din thar a ni a, kum ruk chhungin camp 377 siam thar a ni a. Beihpui thlak nan leh thawktute intuaithar nan Rs vaibelchhe 3,523 pek chhuah a ni a. Special Infrastructure Scheme hnuaiah Rs vaibelchhe 1,757 dah a ni bawk.
LWE tamna thin district-ah hmasawnna ruhrel tam tak din a ni a, kawng km 14,978 sial thar niin telecom tower pawh 9,050 tun hman a ni a. ITI 46, skill centre 49 leh Eklavya sikum 179 din a ni bawk.
Heng bakah hian dak in 6,025, bank branch 1,804 leh ATM booth 1,321 hawn thar a ni a. Special Central Assistance atan Rs vaibelche 3,848 hman a ni.
Maoist inpete pawh chhawmdawlna pek zel niin an hruaitu chin chu Rs nuai 5 leh member-te hnenah Rs nuai 2.5 pek an ni a. Kum thum chhung thla tin Rs 10,000 pek zel an ni a, thiam thil an zir duha an zirna tur siamsaka zirtir thin an ni bawk.
Union home ministry chuan tuna dinhmun mek thlira tharum thawhna tlahniam te, inpe an tam em em reng te chuan an tum hunah tak India chu Maoist awm lohna rama an siam hman ngei an inbeisei tih an sawi.