March 6 & 7 ah Chapchar Kut

Chapchar Kut 2025 Organising Committee chu an chairman, chief minister Lalduhoma hoin Ningani khan an thukhawm a. Kumin Chapchar Kut hman dan tur relin, thupui atan “Zonun zemawi – Hawihhawmna” tih thlan a ni.
Chapchar Kut hmanna pui ber hi Aizawl Sipai Lammualah March 6 leh 7 a hman tum a ni a. March 6 hian Home minister K Sapdanga chu khuallian a ni anga, March 7-ah chief minister khuallian a ni ang. Kut denchhen programme pawimawh dang erawh March 3 atanga kalpui tan tum a ni.
March 3-ah Chapchar Kut pual tlan (Kut Run) buatsaih a ni anga, March 4-ah flower show leh painting & exhibition show neih a ni ang. March 5-ah Chapchar Kut heritage tour buatsaih a ni anga, hemi ni vek hian Falkawn Zokhuaah Mizo pi leh pute nun (Mizo typical life) entir tan a ni anga, March 6-a neih chhunzawm tur a ni. March 5-ah vek hian Kut pual handloom, textile & handicraft exhibition leh food processing & food court hawn a ni ang a, exhibition & food court hian March 7 thleng a awh ang.
Chapchar Kut hlawhtling leh hlimawm buatsaih a nih theihna atan tih tur pawimawh sawi niin, mawhphurtu tur an inruat a, senso tur pawh an rel bawk.
Chapchar Kut hmanna tur sum hi tunhmain a hranin sawrkarin budget-ah a dah hrang ngai loa, kumin sawrkar budget atang khan cheng nuai 100 dah a ni. Hei hian mamawh zawng zawng a daih dawn loh avangin sum hmuh belh theihna tur chi pawh sawiho a ni.