Marriage… Bill, 2026

Mizoram Legislative Assembly budget session kal mek February ni 24, 2026-a House-in a pass tak bill pakhat, “The Mizo Marriage and Inheritance of Property (Amendment) Bill, 2026” chuan social media leh news media platform hrang hrangah sawi zui a hlawh nasa hle a. He Bill passed a nih hnu, a ni thumna niminah khan, MHIP Gen Hqr. chuan, ‘Mizo hmeichhiate tan a him lo a, a tha tawk lo’ tiin thuchhuah an siam a.
MHIP chuan, Mizo Customary Law Committee-ah tel mah se, he Bill, 2026-ah erawh hi chuan ràwn an ni lova, hrilh pawh an ni lo tih sawiin, Bill chu an pawm lo tih thuchhuahah an tarlang a. “MHIP chuan Mizo hmeichhiate tana Dan tha ber tur leh, siam that ngai te kan zir chiang mek a. Chuvangin, he Bill 2026 passed tawh hi sut a, ennawn a, siam that leh ngei ni se tiin The Ninth Legislative Assembly hi kan ngen tak meuh a ni,” tiin thuchhuahah tarlan a ni.
He amendment bill-a sawi hlawh ta bera chu ‘Amendment of Section 2’ hi a ni. Principal Act (The Mizo Marriage, Divorce and Inheritance of Property Act, 2014)-ah chuan helai Section 2 hi heti hian dah a ni a: “This Act applies to any person who belongs to any Mizo tribe. It also applies to marriages where male members of the parties belongs to any Mizo tribe” tiin.
Section 2 Amendment-ah chuan heti hian dah a ni ta a: “This Act applies to all marriages where both the parties belong to Mizo tribe or where the male member to the marriage belongs to any Mizo tribe” tiin.
Hemi chungchang hi a Bill neitu chief minister chuan heti hian a sawi zau a: “Inneihna hi a hma kha chuanin mipa hmeichhia huap vekin siam a ni a, tunah erawh hi chuan, a hmeichhia leh a mipa Mizo ni, a huap ang a, a mipa zawk Mizo a nihin a huap ang a, hemichhia chu a huap tel tawh dawn lo a ni. Kan hmeichhiaten hnam dang an neih khan an Mizo-na a tawp tawh dawn a ni; an faten tribal nihna te an claim thei tawh lo vang a, kan dan hnuaiah hian an awm tawh dawn lo tihna a ni a, mipa kha Mizo a nih erawh chuan he dan hian a la huapin a la hmang zui thei zel dawn tihna a ni” tiin.
Hei hian social media lamah sawi zui a hlawh hle a. Mizoram budget session kal mek niminah pawh khan, hmeichhe hming chungchang private member resolution sawi honaah, chief minister chuan hemi chungchang hi a sawi chhuak leh a. Mizo Hnam Dan Bu (Mizo Customary Law) Chang 74-ah, ‘Mizo hmeichhiain hnam dang pasala a neih chuan, hnamdang chhungkuaah a luta ngaih a ni’ tih a awm thu chief minister hian sawi chhuakin, “Tun dinhmunah customary law-ah hian, tribal a nihna pawh kha a hloh nghalah kan ngai a, an fate pawh tribal certificate kan pe thei tawh lo zui a ni a. Chu chu kan danina min dinpuina chin a ni….’A Mizona pawh kha a hloh a ni’ pawh zuk ti ila, a sual em em chuang lova, a chhan chu, a fate pawhin tribal nihna an chàn chhoh tawh kha chuanin, a Mizo nihna a chàn avanga tribal certificate pawh nei thei tawh lo kha a ni zui ve lo thei lova;’tiang kha kan hnam dan hi a lo ni…” tiin niminah chief minister hian House-ah a sawi chhuak leh a ni.
Heta tanga lo lang chiang em em ta chu, ‘Dan hi a nihna dik tak sawifiah theih tura chipchiar deuh zawka chiang taka ziaka dah a ngai’ tih hi a ni. Dan hi chiang fek fawka ziaka dah a nih loh chuan, ngaihruatna hmanga sawifiah (interpret) a ngai thin a, chu chuan inhnialna a chawk chhuak mai ni lovin, harsatna a siam zui ta thin a ni.