Martar-te thlah liam ta

Ningani khan Lamka-a Peace Ground-ah Zo hnahthlakte’n martar-te thlahna hun an hmang a, ram leh hnam vanga nunna chan mi 12-te vui liam an ni.
Peace Ground-ah hian November ni 11-a Jiribam district-a CRPF te tihhlum mi 10-te leh mi dang pahnihte thlahna hun hman a ni a, chawhma dar 11-ah an tan. Chumi zawhah martar thlanmualah an phum a ni.
CRPF tihhlum mi 10-te hi Silchar Medical College-a post mortem tih zawhah November ni 16-ah Lamka thlenpui an ni. Post mortem report hmuh phawt an ngiat avangin anmahni thlahna hun hman nghal a ni lo a, Lamka-a District Hospital-ah an ruang hi dah a ni.
Nilaini khan mi 10-te ruang hi damdawi in atanga la chhuakin an in theuhah an hawpui a, zanah khawtlangin an tlaivarpui.
Lamka atanga thu dawn danin, an in theuhah hian kohhran lamin hun an hmanpui a, zan lamah lumen an ni. Puan an dawng hnem a, tlaivar pawh an thahnem. Dawr pawh a tam zawk chu an inkhar ang an ti a, zing lama inhawngte pawh chhuna hun hman lai leh ruangte Peace Ground panpui an nih lai chuan an inkhar an ti.
A tukah motor-in ruang hi Peace Ground panpui an ni a, tun hnaia nunna chan mi dang pahnihte nen anmahni thlahna hun hman a ni.
Peace Ground-a an hun hman hi tlawmngai pawl hrang hrangte buatsaih a ni a, martar-te sunnan minute khat ngawi rengin an ding a, anmahni zahna entir nan silai an hmet puak bawk. Rev JF Lalropuia’n tawngtaiin hun a hawng a, Rev Dr S Vung Minthang-in thlamuanna thuchah a sawi. Rev Th Khuala Vaiphei-in tawngtaiin a tin a, chumi zawhah martar thlanmualah vui liam an ni ta a ni.