Masi pual thisen pek kalpui mek

Masi pual thisen pek kalpui mek
Kumin December thla chhungin Mizorama blood bank hrang hrangah ‘Krismas puala thisen pek’ kalpui tan a ni a, Thawhlehni khan Civil Hospital Aizawl Blood Bank-ah senior medical superintendent Dr ST Lalruatfela’n a hawng.
Krismas puala thisen pek hawnna inkhawmah hian Association for Voluntary Blood Donation (AVBD) hruaitute, MSACS hotute leh Civil Hospital Aizawla thawktute an tel.
Krismas puala thisen pek huaihawt chu Kristianna leh Mizo nihna nen a inhmeh tih Dr ST Lalruatfela hian sawiin, “Mizo thalai tam tak ruihhloin a tihbuai laiin, thisen pe tur thalai tam tak an la pungkhawm thei a. Midang tan luangchhuak tura thalai heti zatin thisen an pe hi mi tha, midang tana luang chhuak kan la tam em em a ni tih a entir a ni,” a ti.
Krismas puala thisen pek huaihawtnaa hma latu AVBD chungah a lawm thu sawiin, hospital ringawt hmalakna in damlote thisen mamawh an phuhru thei lo a, AVBD hmalakna azarah mirethei zawkte leh mamawh ngawih ngawihten thisen an dawng thei tih a sawi a ni.
Krismas puala thisen pek hi AVBD, MSACS leh Blood Bank hrang hrang huaihawt a ni a. Kumin December thla chhung zawng kalpui a ni dawn.
Krismas puala thisen pek hawn ní-ah hian Civil Hospital Blood Bank-ah Mizo Higher Secondary School zirlaiten tunhnaia zawh tak Mizoram HSS Games 2024-a an champion lawmna atan thisen an pe nghal a ni.
Hetihlai hian Thawhlehni khan Govt KM Higher Secondary School NSS Unit chuan Civil Hospital Aizawl tan thisen unit 42 an pe. Govt KM HSS-ah hian NSS Unit 4 awmin, kumtin NSS-in kum khat atana thisen pek dan tur a duanlawkah tum hnih tal an pe ziah a ni.

(BOX)

Tunhnaia Aizawla Krismas pual thisen pek

No. Blood Bank 2019 2020 2021 2022 2023
1. Civil Hospital Aizawl 690 1108 1378 1661 1142
2. Synod Hospital 338 179 317 267 199
3. ZMC Blood Bank 64 26 128 NA 302