JC.Zoremi Hmar Joute
-- Advertisement --
Sikni êng mawi leh zan dai tla te, thlifim vawt var mai thaw heuh heuh thin te, Tlângsam par vul chúk mai leh Bawngpu pâr eng tiarh te hian Lal piancham hnaih tawh thu an hril a, kan duh emaw, duh lo emaw lung a lengin Bethlehem ran in lam kan hawi thup tawh mai thin a, chu hun Lal piancham hun hlu leh duhawm tak chu hmuakin, kan theih ang angin kan lo inbuatsaih ve thin.
Thingtlanga piang a, kum 17 ka nih thlenga awm ka ni a. Kan naupan lai krismas kha a lo nuam ber mai hian ka hre thin. Tlangsam a par atang hian masi hnaih tawh dan kan hre thiam a, tui chawi kawngah ‘Masi a hun, tlangsam a par, kawr thar neih a hun e, ka pi ka pu, kawr thar min lei, min lei loh chuan cheng za i chawi ang’ tiin. tin mawng bengin kan zai lau lau thin. Lungkham em em nei hek lo vi, kan lungkham awmchhun chu masi kawr thar leh dawhthlak kha a ni mai a, exam pui chawlh tawh si, masi la thlen hma si-a kan nun dan kha vawiin thleng hian sawi nuam ka la ti a, khawpuia piang leh sei lian tam tak tawn ve loh thil tam tak kan ti thin kha thingtlang naupang nih nawmna chu a ni mai.
Huan leh dai hnai deuhah thing tuai leh mau hmangin bûk lem kan sa a, kan bûk lemah chuan mei chhemin ‘bai lem’ kan chhuang thin. Bai lem chhuan hi chhungte hian min support tha duh lo riau mai thin a, chuvangin kan hmanraw mamawh ang ang chu a ruka ruk chhuah a ngai tlangpui. Bal te, sihneh khawro te, a thei zualin bekang ro kan ru chhuak a, chi leh hmarcha leh bawlhlo dang pawh kan nei kim ve biai a, kan bai a, chaw kan ei khawm thin. A tlangpuiin duhthusamin kan bàl em em vek a, uite rim pawh kan nam tak tak ngei ngei ang!
Masi hma kara chhungte Aizawl zin nei chu thianho zingah an ‘boss’ deuh titih a, an chhungte lo haw hun chu anmahni tluk zetin kan lo nghakhlel ve thin’ sweet leh balloon an hawn thin miau a! Kan khuaah chuan December thla a nih tawh dêk chuan krismas hla an play chuah chuah tawh thin a, kohhran leh khawtlang an inbuatsaih mup mup a. Kohhran lamin masi thawhlawm te khawnin hmeichhe hovin masi ruai buatsaihna tur thing te kan keuh khawm a, mipa lamin hnah an la bawk a. Pa hovin ran talh tur Bawng/sial an kai a, kan lo hmuak ve a, kal hnaih châk si, an kawlh palh hlauva hnaih tha ngam chiah si lo khan kan hêl ve da da thin.
Urlawk ni a lo thleng a, nu ten chhangban tur buhban an han deng a, ‘a mawng khâk’ ei turin kan lo kil ve tiai thin. Inbual ni a nih avang erawh chuan tlai lam kan huphurh em em vek a, nu ten kan chât lutuk bik hlauva pawn ni luma min han bual, nawhlunga min han nawt mai thin kha chu(h)… kan then chawk chawk mai thin. Zanah ‘ka carol e’ kan ti a, mi varanda-ah kan zai a, ba chhum(Bal chhum ni lul lovin) leh chhangban kan hlawh tlangpui. Kawr lum tha nei em em kan awm loh avangin sikri kan khai a, kan kal khur hlau hlau thin. Kid nei chi ka ni a, thianho paruk vel inkawm khawm thinin suah sual rawng kan han bawl tak tak hi chuan chhungte tan phurrit kan tling ve tak meuh thin.
Urlawk zan khat chu kan thian pakhat hi a pain len a phal lo tlat mai a, a tel lo chuan kan kim loh miau avangin a pa chu kan hrem ta alawm; a pa hi thawhah natna vei a ni a, an inhnuaiah sikri khaiin hmarcha ro tam tawk kan keng bawk a, kan ur ta alawm maw le; a khuh zankhua thak! (Nui lai lem emoji hi awm ve se!)
Masi ni a lo thleng ta! Kan harh veleh kan khum lu-a thleng kan dawh chu kan en vat a, Waiwai te, balloon lian chi arbawm tiat te, a aia te deuh leh sweet, toys leh hamrik te a lo awm teuh mai a, thlasik khawvawt pawh sawi lovin kan zuang tho vat a, hlim takin kan dawh thlak chu kan ei a, chaw kan ei kham veleh kawr thar kan la ha dawn zui nen, khatih laia krismas tuka kan hlimna ang kha ka tawng leh khât ta ngawt mai! Chaw kan han ei kham a, kan masi kawr, nu te nawh mam sa ngei mai chu kan han ha a, keini aia nalh leh chuang kha tumah an awm thei lo reng reng ringawt mai a ni! Masi ni tak inkhawm bana thingpui ruai tur chhangban kan thawh khawm te kha a lo tui ngawt mai; kurtai neiin kurtai an rawn thawh bawk a, inkhawm banah kan ei hawng hawng a, krismas kha a ti ‘Masi’ zual a ni.
Ruai theh ni a lo thleng ta. =hian kawma kan leng a nih pawhin chawhnu her a nih chuan zaikhawmnaa nu te kan bel tan a, zai khawm ban veleh(velah a ni lo!) kan chaw ken tur chhum turin nute nen kan han haw a. Chaw kan chhum hmin veleh sande sikul panin, ruai theh turin kan kal ta thin a, fatu ten hnah hmang ngeiin ‘hlui’ an lo siam teuh a, hlui khatah mi panga velin kan kil tlangpui; hnah hmang ngata siam chawhlui ei kha a lo tui ber mai hian ka hria. Tun laiah chuan thlengin mahniin kan ei ta a, a pawina ka hre chuang lo nain hnah chunga ei kha ka la châk zawk cheu! Puar el euvin kan ei a, chaw ei kham tawh si, khua a la en lai si hian nula leh tlangval an leng dùl dúl thin. Field tlangah te, kan khaw hmun thengthaw nuam deuhah an leng suau suau a, mi tawm enthlak tum reng rengin naupangho kan lo hmanhlel ve bawk a!