MAWI LEH DUHAWM – 2

By Rev Dr Ramengliana
Sakhaw hrang hrangte nihna hi tawngkam khat chauhvin sawi tum dawn ta ila. Islam hi ‘inpumpekna’ tiin kan sawi thei ang; Hinduism hi ‘lei leh van nena pakhat kan nihzia hriatna’ a ni ang a, Buddhism hi ‘engmah lo mai a ni’ tiin; China ho sakhua Confucianism chu yin leh yang in buk tawka siam tumna a lo ni leh ang a, Kristian sakhua erawh chu ‘hmangaihna sakhua’ kan ti lo thei lovang.
Pathianin khawvel a hmangaih em em a…
Kan sakhaw thuchah intanna chu ‘Pathianin khawvel a hmangaih em em a…’ tih hi a ni tawp mai a ni. Chu khawvel chu a changin Bible hian ‘lei leh van leh thil awm zawng zawng’ sawi nan a hmang a, a changin he ‘lei/khawvel’ sawi nan a hmang bawk a, a hmanna deuh ber chu ‘mihringte’ sawi nan a ni. Kan rilru puthmang leh kan thiltih zawng zawng hi hmangaihnain a luan chhuah vek loh chuan dik lohna a nei a, bâk neiin tlakchham a la nei tihna a ni. Tirhkoh Paulan, “A ropui ber chu hmangaihna hi a ni,”(I Kor. 13:13) a ti si a. Hmangaihna hi kan thupui ber chu a ni a, a nih loh palh pawhin kan thupui ber tur a ni a. Hmangaihna a tel loh chuan kan thuhril a hil a, kan hlim a ho a, kan rawngbawlna a ro a, kan nun a tak lo mai thin a ni. Chu hmangaihna chu Pathian zepui ropui a ni si a. Hmangaihna tawp lova min hmangaih hmasak avanga chu hmangaihna chu kan nun atanga luang chhuak ve tur chu a ni.
Engvanginnge Pathianin min hmangaih le?
Engvangin nge Pathian chuan mihring misual, Amah helsan tawh te, Amah duhna nei lote chu min hmangaih tak viau mai le? tih zawhna hi inzawh theih a ni. A chhanna awlsam ber chu ‘Kan hre lo’ tih hi a ni awm e. Keimahni lamah a chhan hmuh tur a vang em em a ni. Min khawngaih avangin min hmangaih a niang…ni lo…min hmangaih avangin min khawngaih a ni zawk ang! ‘Hmangaih khawngaihna a niang’ emaw, ‘Khawngaih hmangaihna a niang’. A dik thei vek mai. A sawi awlsam dan ber chu ‘Min hmangaih vangin min hmangaih a ni,’ tih hi a ni e, an tih chu. Khawvel chanchinah hian tlangval tan nula hmeltha, zei bawk si hi ‘hmangaih’ a la harsa ngai lo. Inchuhin an inchuh thin. An insual phaha, an inhuat phah fo. Nula tan pawh pa hausa hi ‘hmangaih’ a la harsa ngai lo a niang. Tar nia kan ngaih tawh pawh nei duh mai an la tam em mai! Hmangaihna tur chhan a tam em a ni! Mahse, hmangaihna chhan tur zawn hmuh tur awm tawh lo hmangaihna chu Pathianah chauh a awm. Pathianin min hmangaihna chhan nia ka hriat tak ber chu – min hriat chian em vang hi a ni. A tel lova kan chan chhiatzia hi a hre chiang em a ni. Kan nihna leh chan a chau em mai!
Misual hma ngaihna chu hmangaihna tak
Tum khat chu Mela-ah kan kal ve mai mai a. Beisei aiin nuam kan ti ta phian a. Hmun khatah hian thir len bawm chhungah hian saphai an lo khung a. A lianin a che tual tual mai a, a hmuhnawm hle. Chu saphai bawmah chuan âr pakhat hi an dah bawk a. Chu âr chu saphai chaw atana dah a ni a. A riltam hunah a dawlh mai dawn a ni. Amaherawhchu, ar khan a dinhmun hlauhawmzia leh chhiatzia kha a hre miah lo! Thei a inti a, saphai kha pawl nel a tum vel! Khawvel enjoy a tum, a chapo, midang a hmusit, midangte a er, a induh….Saphaiin a duh hun huna a dawlh tur a ni mai si a le! A dinhmun a hre lo teh e! Amah tel lo va kan chan chauh zia…beidawnna, rumna, lungngaihna, chhiatna, hrehawmna kan hmachhawn a, kan tawlh lut mêk a nihzia hre chiangtu ber hian min hriat chian em avangin min khawngaiha min hmangaih lo thei lo a ni. Hmangaihna hi Mizotawng hian a chiang ber mai. Hma ngaihna a ni. I hma Pathianin a ngai a ni. I tana tha tur a ngaihtuah a, a buatsaih a ni. Nangma tan chauh. I thatpui tur leh i nunpui tur kha. Thiltha induhsakna a ni e. Chutiang bawkin midangte hma i ngaihna bawk chu i hmangaihna a ni ang.
Tihpun rual loh, tihdaih rual loh hmangaihna
Pathian hmangaihna chungchanga sawi sual hlauhawm tak sawi loh theih loh si chu ‘Pathian hmangaihna tipung turin tih theih engmah i nei lo’ tih hi a ni. Pathianin a hmangaih che chu a full a ni tawh a, belh theih a ni tawh lo. A vaiin i chang tawh a nia. I music player kha full volume aia ringin i herh ring zo tawh lo a nih kha. Kan thatna te, kan thawhrimna te, kan thil chân te avang hian min hmangaih zual ta sawt emaw kan ti a ni mai thei. A ni lo. A hmangaihna che hi i dam chhung zawngin i chhang seng dawn lo a ni zawk. Hring chan chhung leh chatuan pawhin a thatna i rul seng ngai lo vang. Tin, ‘Pathian hmangaihna tidai turin tih theih engmah i nei lo’ tih hi hriat thiam har a ni leh a. Thenkhat chu sual kawng an han zawh a, Pathian duh lo zawngin an han nung deuh fo a, Pathianin haw ta leh hmangaih ta lo angah an inngai chawk. Unau duh tak, Pathian hmangaihna hi i awm danah a innghat lo a, i thiltih ang zela hmangaih che a ni lo a ni. A hmangaihna ropui hi i tinep thei lo a. Tihtlem theih loh hmangaihna a ni a. A hmangaihna tidai turin tih theih i nei lo. A duh loh zawnga i khawsak hian nangmah leh nangmah i inhliam mai a ni zawk e. Thlasik khaw vawt eltiangah mei lum i kal san hlat poh leh a vawt ting ang hi a ni. Pathian i hlat hian nangmah kha a tuartu i ni zel ang. Pathian ropuina erawh chhete pawhin a kiam si lo.
Chu hmangaihna chu a ni hla siamtuin ‘mawi leh duhawm’ a lo tih ngawih ngawih leh a awmzia hretuten an sak nin theih loh chu.