Maxi cab chesualah pathum an thi
Maxi cab chesualah pathum an thi
Aizawl leh Guwahati inkara service maxi cab chesualah mi pathum an thi a, pakhat a hliam.
Thudawn danin, Guwahati atang hian January 14 zan dar 8.00 vel khan Mizoram panin maxi cab service pathum an chhuak a, zing dar 5.00 velah Assam lam chin Sonapur an thleng. Hetah hian chawlh an tum laiin, lirthei lian tlan tam lutuk vanga traffc jam-a tan rei hlauin chawl loin an tlan leh a, a hnung bera tlan AS-01 KC 9188 chuan a zui ve ta lo tih a hmaa maxi cab tlan pahnih hian zing dar 6.30 velah an hre chauh a ni. An hriat tlai chhan hi, lirthei lian kara inzep chho reng an nih avangin inhmu pha renga tlan reng a har a, ngaih tha takin an inzui chho zelah an ngai a ni.
Maxi cab hnuhnung ber hian a zui ve lo tih an hriat hian a driver hi biakpawh an tum thin a, phone a la lo. A hnua biak an tum lehnaah police-in an lo chhang a, hetah hian an chesual tih maxi cab dang pahnih hian an hre ta a. Driver pahnih hi lirthei remchang angin an tlan let lehnghal a ni.
Lirthei hi Meghalaya chhung Ratacherra thlen hma km.10 velah a chesual a, a chetsual chhan hi chiang taka hriat ni lo mah se, a khalhtu a muthlu zeuh a nih rin a ni. Lengkir deuh reuh, metre 50 vela sangah tlan liamin a thlang luite ah an insawh lut a, a hmunah hian a khalhtu Nasim Choudhury, Sonabarighat Silchar leh passenger zing ami Zothanpari (52), Tuithuang Venga awm thin, Delhi-a an chhungkuaa khawsa ta chu an thi nghal a; hliam pahnih an awm.
Hliamte hi Umpliang PHC panpui an ni a, damdawi in thlen hnu hian Jenny Lalrinthangi (23), Thinghlun Mamit district chu a hliam tuar loin a thi ve leh a. Dim Hau Cing, Myanmar lam mi chu Umkliang PHC atang hian NEIHGRIMS-a enkawl tura lak a ni.
Chetsual thu hriat a nih veleh Shillong Mizoram House deputy resident commissioner Lalchhanhima leh Shillong Group YMA chuan a tul ang an buaipui nghal a ni.
The Aizawl Post thudawn danin, inter state maxi cab khalhtute hi an rim hle a, mutmu tuah mumal hman lo leh taksa chau takin lirthei an khalh fo a, chetsual phah theihna a sang hle thin tih sawi a ni.