May thlaah Pro Volleyball League an khel \an dawn

May thlaah Pro Volleyball League an khel tan dawn
May ni 11 atanga June ni 13, 2026 chhungin LPS Arena, Falkland-ah mipa team sarih leh hmeichhe team li inelna Pro Volleyball League vawi kuana khelh a ni dawn.
Thawhtanni han LPS Vision Director Lalsawmliana Pachuau office, Zarkawtah LPS leh Mizoram Volleyball Association-in inremna an siam fel a, mipa inkhel 24 leh hmeichhe inkhel tum sarih, a vaiin inkhel vawi 31 a awm dawn a ni.
Inkhel zawng zawng hi zan dar 8-ah deuh vek tan tura ruahman niin, LPS Vision-in live-in a pe chhuak vek ang.
Mipa team pasarih – Anastasia Electric Veng, Thutak Nunpuitu Team, Tuichangral, Khawbel, Sihphir, Hunthar leh Chhinga Veng Spikers-te vawi khat theuh an inkhelh kual chhuah hnua a sang paliin semi-final an lut dawn a ni.
Hmeichhe team pali – Tuichangral, Chhinga Veng Spikers, ITI Veng leh Eric Pautu Academy-te tum khat theuh an inkhelh kual chhuah hnua a sang pahnihin final an lut ve thung dawn a; June ni 12-ah hmeichhe final khelh a ni ang a, June ni 13-ah mipa final hmangin championship hmawr bawk a ni ang.
Championship hnuhnung ber final-ah May ni 24, 2025 khan Anastasia-in 26-24, 25-10, 21-25, 25-21 (3-1)-a TNT hnehin a vawi hnihna’n mipa Pro Volleyball-ah an champion a; May ni 23, 2025 hmeichhe final inkhelah Luangmualin 25-20, 25-20, 21-25, 25-21 (3-1)-in Jimmy Club, Kanan an hneh ve thung a, a zawna vawi thum an champion-na a ni.
Tun season-ah nikuma hmeichhe final lut team pahnih an tel zui lo a, a vawi khatna’n champion tumin team thar pali a inel ang.
Mipa lamah nikuma tel team paruk an awm zui leh vek a, hremna avanga season liamtaa tel thei lo Chhinga Veng an kir leh bawk a ni.