Mayor leh khawpui enkawltu rual intawhkhawmah Aizawl mayor tel

Mayor leh khawpui enkawltu rual
intawhkhawmah Aizawl mayor tel
2nd All India Mayors & RWAs (Resident Welfare Association) Summit 2023 New Delhi-a neihh Aizawl mayor Lalrinenga Sailo chuan khualzahawm zinga sawm a nih angin Nilaini khan he Summit-ah hian a tel.
Aizawl khawpui enkawl nana Aizawl Municipal Corporation hmalakna hrang hrangte Lalrinenga Sailo hian sawiin, local council hnathawh leh tangkainate a sawi a. Aizawl khawpui bawlhhlawh paih leh sawngbawl chungchanga AMC hmalakna hrang hrang zingah PPP mode-a kalpui a nih thute, tunah hian khawpui bawlhhlawh nitin garbage truck 150 hmanga paihfai thin a nih thu te a sawi a. AMC budget pum atanga zaa 21.51 chu bawlhhlawh paih leh sawngbawlna’na dah a nih thu te a sawi a ni.
“Aizawl khawpui hi state pawnlam atanga tlawhtuten fai an tih thu an sawi thin a. Lirthei khalhte pawh an polite in, horn hman ngai loa lirthei khalh theih a ni chu ‘Silent City’ ti tein min sawi a, min tlawh chak thin hle,” tia sawiin, tunhnaia AMC-in hmasawnna a neihte a sawi bawk.
Aizawl mayor hi Green India Award thenkhat semtir a ni a. AMC joint municipal commissioner Lalremruata Kullai chuan All India Mayor Summit-ah hian Aizawla waste segregation kalpui dan a sawi a. An ni hi AMC executive engineer R Lalmuanpuia leh hotu dangten an tawiawm a ni.
All India Mayors & RWAs Summit-ah hian khawpui enkawlna, environment humhalh leh tunlai hmasawnna in khawpuia nghawng a neih dan bakah thil chi hrang hrang dang sawiho a ni a. Sawrkar laipui leh state sawrkar hotute, mithiam chi hrang hrang bakah ram hruaitute, company hotute, municipal body leh development authority hotute, ram chhung hmun hrang hrang atangin an fuankhawm a ni.